GINAKASUBO naton ang balita nga nagtaliwan na sadtong Domingo si Kapid Gabio sang lokal nga radyo.
Isa si Kapid sa mga maukod nga reporter kag maisug nga komentarista sa radyo nga indi mapahog. Indi man siya ugaling basta magpapatay lang. Nagapaniguro man siya. Dala niya pirme ang iya ale-ale nga luthang agud madampigan ang kaugalingon.
Kaupod ko si Kapid sa pagtukod sang Iloilo City Hall Press Corps (ICHPC) sadtong 1993. Ginatapuan ini sang mga reporter sang tanan nga tri-media outlets nga na-assign sa city hall. Gina-representar ko sadto ang Panay News.
Kaupod namon ni Kapid sa pagtukod sang ICHPC sanday Alex Vidal, Art Calsas, Roger Tamon, kag mga 10 pa.
Wala ako maghuna-huna nga mabotohan ako sang grupo bilang una nga presidente (charter president) sang ICHPC sadtong 1993, nga sadto man ginbalay ang Constitution & Bylaws sini.
Ginhisugtan namon ang isa ka “united front” agud bugtawon sa amon mga balita kag mga opinyon ang “public awareness” kag mag-“provoke action” para sa kawsa sang maka-pumuluyo nga gobyerno.
Gintawag namon ini nga “Operation Performance Audit”, nga nagabantay kag nagatugda sa hinimuan sang mga opisyales sa siyudad.
Nangin madinalag-on naman ini, although nag-create ini sing madamo nga kaaway sa amon. Pero okey lang. Amo gid ina kon may kawsa ka.
Isa si Kapid sa masupog nga nagadala sang mga isyu sa iya programa sa radyo, kag sang matapos ang akon termino, si Kapid ang ginsaligan sang grupo agud magbulos sa akon kag magpadayon sang amon kawsa.
Pid, indi kami malipat sang daku mo nga amot sa kawsa sang ICHPC sa pagduso sang kadalag-an sang “good government” sa panahon ko bilang presidente kag sang imo man panahon.
Kabay nga upod mo na si God sa Iya Kaharian!
***
Gin-agaw, ukon gin-coup d’ etat, sang Myanmar Army ang democratically-elected nga gobyerno sadtong Pebrero 1, 2021.
Tungod kuno sa “fraudulent” election nga nagpadaug sang National League for Democracy nga ginapangunahan ni Aung San Suu Kyi!
Ginpilit sini nga isa pa ka eleksyon ang pagahiwaton pagkaligad sang isa ka tuig.
Gin-kwestyon ini sang mga pumuluyo nga nag-protesta gid sa dalanon sing halos kada adlaw agud ibalik sa poder ang nagdaug sa eleksyon nga grupo ni Suu Kyi.
Ngaa kuno liwaton pa ang eleksyon samtang bisan isa ka ebidensya nga mabakud wala man ma-presentar ang kontra partido.
In fact, ang resulta sang eleksyon nagpakita sang daku nga abanse sang grupo ni Suu Kyi nga kon may dinayaay gid man sa ila bahin indi na ini malingkang kag basi magdaku pa ang abanse tungod sa dinayaay man sang kontra.
Kag sin-o gid ang Military Junta agud mag-desidir kon bala may dinayaay ukon wala ang nagligad nga eleksyon? Indi man ini election body ukon husgado nga may poder dira.
In other words, ilegal ang ginhimo nga coup sang Military Junta agud husgaran ang kuno dinayaay sa eleksyon kag hiwaton ang bag-o nga eleksyon.
Nahuy-an gid seguro ang nagapamulitika (nga indi tani bagay) nga Military Junta sa pagkapierde sang kontra partido nga kaalyado sini.
Gani ini lang seguro ang ila medyos agud mabawi ang ila kahu-anan – ang i-lutong macao ang liwat nga eleksyon pabor sa ila grupo gamit ang pwersa sang militar.
Apang wala nagpadaug sa kulba ang linibu nga naga-protesta bisan pa sa masunod na nga “Reign of Terror” sang Myanmar Army sa idalom sang Military Junta, samtang nagasinggit sing “Ibalik ang Demokrasya!” kag bisan 114 na sa ila ang ginpangluthang patay.
Na-“horrified” ang Estados Unidos kag iban nga pungsod sa ining kapintas sang Myanmar Army sa idalom sang Military Junta. Pila sang Myanmar soldiers ang nagpalagyo gani agud indi masunod ang sugo nga pangluthangon ang mga naga-protesta.
Gani, nagpirma sang joint statement ang mga defense chiefs sang 12 ka pungsod, nga nagalakip sang Estados Unidos, Germany, Denmark, Canada kag Australia kag 8 pa ka pungsod sa Uropa kag Asya, agud kondenaron ining “Reign of Terror” sa Myanmar.
Gin-remind nila ang Myanmar Army sang international standard of conduct “for protecting and not harming the people it serves”.
Contrary man sa international standard ang pagpatuman sang “unlawful orders” sa mga soldado, katulad sang pagpatay sa mga unarmed civilians nga nagapautas lang sang ila lehitimo nga reklamo.
Ang gwa sang Myanmar Army sini amo nga indi sila “protectors” kundi “murderers” sang mga pumuluyo. Nga dapat kondenahon sang tanan!/PN
