Daw wala gid sang sampat nga mga tinaga para sa Hiligaynon translation sang nasambit nga “phrase”.
Basta nagatumod ini sa talalupangdon ukon “outstanding achievement” ukon hitabo.
Sa masami ang “idiomatic expression” nga ini nagatumod sa record books sa patag sang hinampang. Apang sang ulihi, ang “one for the books” na-apply naman sa tanan ngasahi sang pagpaninguha (endeavors).
One for the books.
Indi lang isa o duha, kundi tatlo. Tatlo ka Tirol sa isa lang ka linahe (lineage) ang mga nag-dean sa isa lang ka law school.
Ang lolo nag-Dean. Ang amay, nakaagi man Dean nga naga-retain sang title “Dean Emeritus.” Ang apo amo ang current Dean. Tatlo sila sa isa lamang ka linahe sang mga Tirol sa isa lamang ka eskuelahan. (Kon family business, natural lamang nga itugyan sa masunod nga henerasyon ang pagpamuno. Pero indi ini korporasyon. Law school ang ginahambalan.. kag ang mga Tirol nagbaton lang sang gintan-ay sang mga pari’ng Augustinian).
Daw sa indi naman ini bag-o pa nga ihibalo…pero for the record lang.
Tatlo ka henerasyon nga law deans sa sulod sang masobra pito ka dekada nga pagdumala sang legal education sa College of Law sang University of San Agustin.
Lolo. Anak. Apo.
Sanday Deans Tirol: Atty. Benjamin H. Tirol, Dr. Cesar T. Tirol kag Atty. Jose Mari Benjamin Francisco U. Tirol.
Si Atty. Benjamin Tirol ang ikaduha nga Dean sang USA Law. Sa iya pagdumala sang law program sang 1947, ang San Agustin padayon nga nakaangkon sang reputasyon para sa kalidad nga edukasyon kag good bar record.
Pila ka bar topnotchers ang na-produce sang eskuelahan sa idalum sang iya deanship nga naglawig tubtub 1968. Ang nagbulos sa iya nga si Atty. Corazon Miraflores nga amo naman ang ginsundan sang iya bata nga si Dr. Cesar T. Tirol.
Si Dean Cesar Tirol isa sa mga legal luminaries sang Iloilo nga may Doctor of Laws. Gindumala niya ang College of Law sang USA sa sulod sang beinte ka tuig (halin sang 1977 tubtub 1997). Magluwas sa pagseguro sang kalidad nga law education kag pag-produce sang mga bar topnotchers, ang San Ag nagbukas sang iya Pre-Bar Review Class sang 1981, sadto ang labing una kag isahanon nga review class sa gua sang Metro Manila.
ANG USA College of Law accredited sang PAASCU nga nag-certify nga ang law program sini naka-satisfy sang standards for deregulated status, Level III.
Sang dekada 80, pila pa gid ka Augustinian bar examinees ang nakasulod sa top ten – Dolores P. Abad (3rd) sang 1984 Bar exams, Ma. Elena Gallenero-Opinion (10th place) sang 1985 Bar exams kag Cyril Regalado (7th) sang 1988 Bar exams.
Ginkilala na sadto ang San Agustin nga strong competitors sang mga Manila-based law schools kon edukasyon sa abogasiya ang hambalan.
Pagkatapos sang pagpamuno ni Dr. Tirol, nagbulos si Dean Juana Juditha P. Panigbatan-Nafarrete nga nagpatuman sang “Quality Admission, Quality Retention Policy” padulong sa academic excellence kag pag- improve ang passing percentage sang College of Law sa Bar Examinations.
Si Atty. Jose Mari Benjamin Francisco U. Tirol ang ikatatlo nga henerasyon nga Dean Tirol sang USA Law. Apo ni Benjamin. Anak ni Cesar.
Mas kilala sya sa hayo nga “Trons”. Makahangup sa mga millennials. Amigo nila sa gua pero “he meant business” sa tion nga ara na sa ugsaran sang eskuelahan, labi na sa hulot-klasehan.
Sa idalum sang iya lideratura, nagpasakop ang college of law sa national kag international moot court competitions, kag sa masami dala nila pauli ang best mooter o best memorial. Sa iya man pagpamuno, naka-produce ang San Ag sang bar topnotcher nga si Atty. Allana Babayen-on (2016 Bar) makaligad sang 28 ka tuig since Regalado. Competent ang faculty members, napulo sa ila may Masters of Laws degrees kag may thesis.
Gindapit sa USA Law ang mga legal stalwarts kasubong nanday Senior Associate Justice Antonio Carpio, Justice Francis Jadeleza, Supreme Court Chief Justice Sereno Maria Lourdes Sereno, Solicitor General Florin Hilbay agud maatubang mismo sang mga law students ang mga gung-an sa hudikatora, magluwas nga hisayran direkta sa ila ang ila mga paino-ino, panindugan o panan-aw sa mga isyu.
Ang USA Law ginkilala nga ikanapulo (10th) nga may labing mataas nga passing percentage sang 2017 bar exam sa tanan nga mga law schools sa pungsod.
Bisan bataon, dala ni Trons Tirol sa iya pagka-dean ang manggaranon nga law experience (Chief sang legislative staff sa manubo nga panalgan sang Kongreso, corporate law practice, author sang Anti-Money Laundering Law of the Philippines annotated kag Desk book for Philippine Notaries) kag ang impressive scholastic records (lunsay cum laude sa USA Law kag cum laude sa iya Master of Laws sa UST).
Hayag nga sa tatlo ka Dean Tirol – ang lolo, ang amay kag ang anak – ang bataon nga Tirol ang may mas malawig nga preparasyon, scholastically.
Sadtong iya panahon, nagderecho sa law school si Dean Benjamin Tirol bangud High School graduate lang ang kinahanglan para makatuon sa abogasiya.
Sa kaso ni Dean Emeritus Cesar Tirol, two year AA degree lang ang pre-law. Sa panahon na ni Dean Trons, indi magkubos sa apat ka tuig ang preparatory to legal education.
Malawig man o malip-ot lang ang preparasyon, ang tatlo ka Dean Tirol nagpangatubang / nagapangatubang sang hangkat sa ila lideratura sa law school. Sadto pa man kag tubtub karon, sa ila pagpamuno nahatagan sang kahigayunan ang isa ka estudyante gikan sa probinsya sa pagtuon sang abogasiya nga indi na kinahanglan pa magkadto sa Manila para sa kalidad nga legal education.
One for the books. Three Deans (gikan sa familia Tirol) sang College of Law sa maragtas sang University of San Agustin, sa Iloilo…for that matter, only in the Philippines./PN
