Ni Cyrus M. Garde
Syudad sang BACOLOD – Naglab-ot sa 37 ka mga puno sang tanom nga marijuana ang narekober kag ginpang-gabot sang mga opisyal sang Barangay Celestino Villacin, Syudad sang Cadiz, Negros Occidental sang Lunes sang aga.
Gindala dayon ang mga tanom sa Cadiz City PNP matapos gin-ayudahan sang mga pulis sa pagpamuno ni Supt. Gerardo Ulanday, mga katapo sang Philippine Drug Enforcement Agency kag Regional Public Safety Battalion, kag gilayon nga ginsunog.
Luwas sa mga dalagku nga tanom, may mga lamigas (seedling) man sila nga nakuha nga nasulod sa plastic.
Nahibaluan nga antes pa man mag-abot ang mga otoridad, ginpangunahan na ni Punong Barangay Arlene Verbo ang pagpang-gabot sang mga tanom nga marijuana kag ila na lang ini ginpresentar sa mga otoridad.
Si Bise Mayor Samson “Jongben” Mirhan sang Syudad sang Cadiz nga nag-upod man didto sa lugar nagpahanumdom gid kay Verbo sa paghalong kasunod sang ila operasyon.
Nahibaluan pa nga ang duta nga ginpangtamnan sang marijuana ginapanag-iyahan ni Jerson Mendez. Sa karon, gina-imbestigaran pa sang mga otoridad kon may kahilabtanan ukon nahibaluan si Mendez sa pagtanom sang nasambit nga marijuana./H
