[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading tag=’h3′ padding=’10’ heading=’63 persona biktima sang palupok sa KN ‘ color=” style=’blockquote modern-quote’ custom_font=” size=” subheading_active=’subheading_below’ subheading_size=’15’ custom_class=”]
Ni Ime Sornito
[/av_heading]
[av_textblock size=” font_color=” color=”]
Monday, January 2, 2017
[/av_textblock]
[av_textblock size=” font_color=’custom’ color=’#0a0a0a’]
Syudad sang ILOILO – Nagsaka na sa 63 ka mga persona ang nabiktima sang mga palupok sa bug-os nga Kabisay-an Nakatungdan (KN) lakip na ang Negros Occidental.
Base sa rekord sang Department of Health (DOH) 6 tubtob kahapon sang aga, ang probinsya sang Capiz ang may pinakamadamo nga nabiktima nga naglab-ot sa 21, ginasundan sang Negros Occidental nga may 20, Syudad sang Iloilo – 11, probinsya sang Iloilo – 9, kag Aklan – 2.
Sunu kay Dr. May Ann Sta.Lucia, tagpamaba sang Oplan Iwas Paputok sang DOH-6, ang pinakabata nga nabiktima sang palupok naga-edad sang tatlo ka tuig.
Ang datus nagikan naman sa duha ka sentinel sites sang DOH-6 nga Western Visayas Medical Center (WVMC) sining syudad kag Corazon Montelibano Memorial Hospital sa Syudad sang Bacolod.
Nagsugod ang monitoring sang DOH-6 sa nabiktima sang palupok sadtong Disyembre 21, 2016. Sa gihapon, ang piccolo nagapanguna nga palupok nga nagsamad sa mga biktima nga kalabanan naga-edad sang 11 tubtob 15 anyos.
Samtang ginasulat naman ini nga balita, indi pa madeterminar ang DOH-6 kon bala mapatas ukon masaka ang nahalitan sang palupok subong nga tuig kon ikumpara sang nagligad.
MALINONG NGA PAGSUG-ALAW SA BAG-ONG TUIG
Sa pihak nga bahin, nangin malinong ang pagsug-alaw sang mga Ilonggo sang bag-ong tuig, sandig sa inisyal nga assessment sang Police Regional Office (PRO) 6 humalin sang Dis. 16, 2016 tubtob kahapon sang aga.
Sa pahayag ni Supt. Gilbert Gorero, tagpamaba sang PRO-6, malinong sa kabug-osan ang pagselebrar sang mga Ilonggo sang bag-ong tuig matapos nga wala sang may nagluntad nga dalagku nga mga insidente.
Ang narekord gid lamang sang PRO-6 sa bug-os nga gab-i amo ang mga minor nga insidente kaangay sang firecrackers-related injuries kag pagpalupok sang pusil nga ginadalahigan sang mga sibilyan.
Daku man ang kalipay sang PRO-6 nga wala sang narekord nga stray bullet incident sa rehiyon.
“Initial assessment on New Year celebration 2017, it was generally peaceful, no major new year related incidents took place since December 16 to January 1,’ kabahin sang pahayag sang PRO-6.
Sa bahin sang palupok, 37 ang narekord sang PRO-6 nga nasamaran samtang lima naman ka mga sibilyan ang nadakpan nga nagpinalupok sang pusil.
Wala man sang pulis nga nadakpan nga nagpalupok sang iya service firearm ukon nag-indiscriminate firing.
Pero mabal-an gid ini sang husto sa masunod nga adlaw sa tion nga maghiwat sang cleansing ukon pagsekyar sang kanyon sang pusil ang mga opisyal sang kapulisan.
Matandaan nga wala ginselyohan sang PRO-6 ang ila mga pusil para ipakita sa publiko ang ila pagkadisiplinado kag pagkatampad sa publiko.
Angut naman sa madinalag-on nga pagsug-alaw sang bag-ong tuig, ang PRO-6 nagapasalamat gid sa suporta sang komunidad nga nag-ugyon sa panawagan sang otoridad nga indi magpalupok kag subongman sa mga media nga liwat-liwat nga ginapanugyan ang pagsunod sa mando sang kapulisan para mangin malinong ang bag-ong tuig./PB
[/av_textblock]
[/av_one_full]
