MADAMO na sang mga doktor kag nurses gikan sa magkatuhay nga mga ospital sa bugos nga Western Visayas ang nabakunahan sang CoronaVac ukon ang bakuna sang Sinovac Biotech Ltd. nga isa ka Chinese biopharmaceutical company.
Nakabatyag sang paglaum ang mga medical fronliners bangud maproteksyunan na sila batok sa COVID-19. Sila na mismo ang nagapang-agda sa mga pumuluyo nga magpabakuna kag dulaon na ang mga pagduda ukon pagpang-alang-alang bangud sila mismo nga medical frontliners ang pamatuod nga wala sang malain nga epekto nga natuga sa lawas nila ang CoronaVac nga bakuna sang Sinovac.
Kabug-usan nga 10,580 ka doses sang Sinovac ang nag-abot sadtong nakaligad nga Biernes sa Iloilo Airport, sakay sa Philippine Airlines Flight 2141.
Ginpahayag ni Dr. Mary Jane Roches Juanico, ang head sang Infectious Disease Unit sang DOH-Western Visayas, nga ang Region 6 ginpainan sang 16,880 ka doses sang Sinovac.
Gin-alokar ang mga bakuna sa anumka priority hospitals sa Region 6 kon sa diin 4 ang sa isla sang Panay kag 2 sa Bacolod City.
Ang mga ospital nga nagbaton sang bakuna sa isla sang Panay amo ang Western Visayas Medical Center (WVMC), West Visayas State University Medical Center (WVSUMC), Iloilo Doctors’ Hospital, kag St. Paul’s Hospital Iloilo, tanan sa syudad sang Iloilo.
Samtang sa Bacolod City, nagbaton ang Corazon Locsin Montelibano Memorial Regional Hospital kag Dr. Pablo O. Torre Memorial Hospital.
Kahibalo kita nga madamo gikan mismo sa bahin sang mga medical frontliners ang nagakahangawa kag may pagdudad sa bakuna, ilabi na nga ini ang gikan sa China. Natukiban man sa mga pagpanalawsaw nga ang ‘side effects’ sang bakuna amo ang ila ginakahangaw-an rason nga sila ang nagapang-alang-alang kag luyag nila maghulat sa mga bakuna nga himo sa Europe ukon sa America.
Suno kay Yin Weidong ang CEO sang Sinovac, sa interview sang The Global Times, nga ang bakuna ang tuman ka epektibo batok sa Covid-19 kag sa iban pa nga mga mutation sang novel coronavirus. Ginabantayan man nila kon paano ang novel coronavirus naga-mutate, hugot sila ga nagatrabaho sa Chinese leading scientists kag national institutions tuhoy sa laboratory studies agud masunod ang tagsa ka pagbag-o kag matalakay ang potential treatment.
Gina-analisar nila ag datus tuhoy sa protection rates matapos ang anum ka bulan lakip ang paghiwat sang eksperimento sa pag-administer sang ikatatlo nga injection sa mga recipients agud makita kon may yara sang higher protection level.
Ginsiling ni Yin nga sa karon ang ila bakuna makasakop sa major novel coronavirus variants. Bisan pa nga may bag-o nga variant nga magtuhaw, ang vaccine producers madasig nga maka-update sang ila mga bakuna agud nga ma-contain ini.
Ginpabutyag sini nga tuman ka daku sang demand sa bug-os nga kalibutan sang bakuna kag ginapadasig nila ang ila kapasidad gikan sa 1 billion tubtub sa 2 billion agud nga makahatag sang bakuna sa mas madamo nga pungsod sibu sa national strategy.
Ginpabugal sini nga ang bakuna sang Sinovac nagapakita sang 80 tubtub 90% nga efficacy rate sa sulod sang duha ka bulan matapos ang duha ka turok.
Sa latest nga datus sang World Health Organization, sa bug-os nga kalibutan, kutob sang Marso 22, 2021, may yara na sang 117,573,007 ka kumpirmado nga mga kaso sang COVID-19, lakip ang 2,610,925 ka napatay. Kutob sang Marso 9, 2021, suno sa WHO nga may yara na sang kabug-usan nga 268,205,245 ka vaccine doses ang na-administer.
Kon matalupangdan naton, madamo sang mga pumuluyo gikan sa Europe, Latin America, Middle East kag Asian countries ang mas nagasalig sa bakuna gikan sa China kaysa sa mga himo sang mga European kag American pharmaceuticals company.
Hulaton naton ang pagsulod sang mas madamo nga bakuna agud nga may taming na kita batok sa virus. Samtang nagahulat, indi kita magpasaway paagi sa pagsikway sa mga health protocols.
Magbinuligay kita nga mapapas ang covid-19 agud nga makabalik na sa trabaho ang kadamuan, maka-eskwela na ang mga estudyante kag maampawan na ang mga negosyo.
Likawan nga mangin pislian sa bakuna. Kon ano ang una nga mag-abot, gilayon nga magpaturok agud nga maproteksyunan ka.
Dulaon anay naton ang pag-diskriminar sa China, ilabi na sa ila bakuna nga epekto kag wala sang malain nga epekto.
Magsalig kag mag-ugyon agud nga ang ekonomiya makabangon. Ipadayon ang pagpaalinton sa iban nga dapat magsalig sila sa bakuna. Buylugan naton ang kampanya sang gobyerno agud nga mapanas ang kahangawa sang tawo sa bakuna.
Ipalapnag ang husto nga impormasyon nga wala sang diskriminasyon kag hilway sa ‘cultural prejudices’ agud nga makaabante na kita gikan sa malawig nga halit sang quarantine sa aton ekonomiya kag palangabuhian. (bertladera@gmail.com/PN)
