Ni CYRUS M. GARDE
Syudad sang BACOLOD – Imbes nga damang, bangkay sang babae ang nakita sang duha ka bata sa sulod sang kuweba sa higad baybay sang Sitio Maaswa, Brgy. General Luna, Toboso, Negros Occidental kahapon sang kaagahon.
Ang kapulisan naman sang Toboso PNP ang nagkuha alas-tres sang kaagahon kahapon sang nasambit nga bangkay sang 50-anyos nga ginang nga ginkilala kay Charie Aburido, pumoluyo sang Brgy. Pinocutan, banwa sang Calatrava.
Ang Gen. Luna kag Pinocutan magkaingod nga barangay nga nahamtangg sa boundary sang nasambit nga duha ka banwa kag may madamo sang kuweba sa baybayon.
Sunu kay Senior Inspector Roberto Mansueto, hepe sang Toboso PNP, wala sang igu sang pagbunu ukon pagluthang sa biktima apang natukiban nga bali ang gusok kag tangkugo sini.
Ang iban nga parte sang lawas sini yara naman sa ginatawag advance state of decomposition sa bahin nga nasilakan sang adlaw apang ang parte nga may bayo pa wala ini naagnas. Nagasuksok ang ginang sang long sleeves nga bayo kag pantalon.
Ang lokal nga health officer sang Toboso naghimu na sang post-mortem sa amo nga bangkay agud opisyal nga mahibaluan ang kabangdanan sang kamatayon sini.
Nahibaluan man sang HUBLAS gikan kay Mansueto nga naglakat si Aburido sadtong Lunes, Agusto 4, sang gab-i para makigkita sa pariente sang iya bana nga nag-text sa iya. Pero wala ginhingadlan sang pulis ang ngalan sang amo nga tawo kay nalagyo na ini.
Siling pa nga ang ginang naglisensya man sa iya bana nga makigkita ini sa amo nga tawo angut sa ila problema sa duta.
Naglakat ini nga wala sang upod kag ginreport na lang nga wala na makapauli.
Sunu kay Mansueto, may duha ka bata nga nagkadto sa kaingod nga kuweba apang may nakita sila nga daku nga damang rason nga nalagyo sila kag nagsaylo sa pihak nga kuweba sa diin nakita nila ang bangkay.
Isa pa gid ka mangingisda nga naka-agi sa lugar ang nakakita man sa bangkay rason nga iya ini ginreport sa pulis.
Sunu sa imbestigasyon sang kapulisan, nagapati sila nga bangod sa konplikto sa duta ang kabangdanan sa pagpatay sa ginang kag ginasuspetsahan nga ang pariente sang iya bana ang responsable diri.
Nahibaluan pa nga isa ka adlaw antes nasapwan ang bangkay, may nnabaton nga text ang bana sang biktima nga ginapakadto man sia sa Brgy. General Luna./H
