[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! | Lamharon pa lang, hangkilan na’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=’custom’ color=”]
Saturday, March 25, 2017
[/av_textblock]
[av_textblock size=” font_color=” color=”]
SINI nga semana gintublag kita sang mga balita nga ang mga suspek sa krimen lamharon, ang iban minor pa.
Gin-unahan ini sang isa ka minor nga nadakpan nga nagabaligya shabu sa banwa sang Sara, Iloilo, kag sang tinalikdan nga adlaw natublag kita sa kamatayun sang Assistant Principal sang Cabatuan National Comprehensive National High School nga naspawan sa Barangay Naslo, Maasin, Iloilo. Ang suspect diri isa ka minor kag isa ka 20 anyos.
Diri sa syudad sang Iloilo ginhugtan sang Task Force on Morals and Values Formation ang implementasyon sang curfew for minors. Sabat man ini sa mga insidente kag kinagamo nga ang mga naulamid mga minor.
Sa sini nga sitwasyon, makasiling kita nga bata pa apang hangkilan na. Sa diin bala sila nagtuon nga maghimo sini nga katuntuhan nga sang una mahimo lang sang mga hamtong?
Madasig kita magbasol sa mga ginikanan sa ila kapaltahan. Matuod, ang una nga edukasyon nagaumpisa sa panimalay. Pero sa pangkabilugan, wala sang ginikanan nga gusto mabutang sa alang-alang ang ila kabataan. Sin-o bala nga ginikanan ang gusto nga maglain ang palaabuton sang ila kabataan? Wala gid.
Ugaling may mga bagay kun kaisa nga indi man perpekto ang ginikanan. Bisan anhon nila ka himakas nga mangin maayo nga ginikanan sa ila kabataan, nagakatabu gid ang paglisa sa banas sang mga kabataan.
Makondinar lang naton ang mga ginikanan kun sila mismo nagapangapin sa ila kabataan sa pihak sang nahimo nga kapaltahan. Kun magsugod na sa paghinabon ang ginikanan sa kasal-anan sang ila bata, nagasulod na ang indi husto nga pagdisiplina sa ila. Huo palangga naton ang aton kabataan pero kun makasala sila dapat makahibalo man kita kun paano sila disiplinahon.
Problema lang abi subong kay may mga kasuguan kita nga nagaamlig sa kinamatarong sang kabataan. Gani bisan ano pa ka berdubal ang kabataan, indi kita makapadapat sang kamot. Bisan gani akig nga nagtaas ang atun tingog pwede kita mareklamo sang kabataan basta minor.
Ang pagtatap kag pagdisiplina sa mga kabataan isa ka dako nga panghangkat sa tagsa ka ginikanan, ilabi na subong nga madamo nga kumpetensya sa sosyodad.
Lamharon pa apang hangkilan na ang mga kabataan subong. Kun sa eskwelahan, dapat magtuon sang leksyon, apang ang iban tuhay ang ginakawilihan. Madata ang gang, grupo, clan kag kun anu-ano pa nga paggrupohay sang mga linghod sang edad. Mabudlay sila nga giyahan bangud may kaugalingon na sila nga paminsaron.
Kun sang una lalaki lang nga kabataan ang mahilig sa gamo, subong mga babaye na ang nagapasimuno sang inaway sa kalye. Hangkilan gid sa katuntohan.
Ngaa bala indi sila mag-upod sa grupo nga nagahimo sang kaayuhan? Ngaa bala mas ginapili ang grupo nga nagaganoy sa ila sa kalalat-an? Siling sang mga sampaton kag mangin-alamon, bunga ini sang pag ka-adbenturoso sang mga kabataan. Nalipay sila nga mabutang sa risgo kag malampuwasan ini nga wala sang sablag. Bugal nila ini sa ila grupo.
Kabudlay gid tatapon ang mga kabataan. Bisan pa nga kita sang makaisa nangin bata man, pero indi naton maggamit ang atun inagihan bangud tuhay naman ang sitwasyon sang ila henerasyon.
Subong nga panahon, lamharon pa lang, hangkilan na./PN
[/av_textblock]
[/av_one_full]
