[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading tag=’h3′ padding=’10’ heading=’Panugdaon ni Matt | Problema sa ‘electricity billing’ sang PECO’ color=” style=’blockquote modern-quote’ custom_font=” size=” subheading_active=’subheading_below’ subheading_size=’15’ custom_class=”][/av_heading]
[av_textblock size=” font_color=’custom’ color=”]
Thursday, April 6, 2017
[/av_textblock]
[av_textblock size=” font_color=” color=”]
ANG mga electricity meter sang Panay Electric Company (PECO), kasubong sang makina kag iban pa nga kagamitan, nagakapalyar man.
Kag posible nga depektoso gid man ang metro sang PECO nga ginapa-gamit sini sa mga konsumidor, nga ang pila sa ila sa karon naga-reklamo.
Ang masakit ugaling – kag makatilingala sa iban – kay sobra gid kaayo ang pagtaas sang ila bulanan nga billing. Daw gin-angtan sila sang linibu nga jumpers sa ila linya nga wala sila kahibalo!
Of course, kon indi depektoso ang metro sang PECO, ti may iban seguro nga rason.
Ang isa ka rason nga gintumbok sa public hearing amo nga basi ga-konsabo ang konsumidor kag ang meter reader. Agud pasakaon ang billing? Daw indi amo haw. Kon mag-konsabo man lang ang meter reader kag ang konsumidor, ina agud panubuon ang billing, indi pataason.
Puede pasakaon ang billing sang konsumidor kon ang naga-konsabo amo ang meter reader kag ang mga abyan sang konsumidor nga mahuyog mag-angot sa linya nga indi sa ila.
Ugaling, daw imposible man nga indi mahibal-an ini sang biktima tungod ang gahimu sini iya man lang mga kasilingan. Isa pa, indi man malayo ang iya metro sa iya puluy-an agud mapanimahuan niya ang kamala-malahan.
Sunu man sa PECO, basi kuno nagtaas ang billing sang naga-reklamo nga mga kunsumidor tungod sa accumulated reading.
Kon wala kita nagsala, ang accumulated reading nga ini amo ang natingub nga mga reading halin sa pila ka nagliligad nga billing tubtub sa sining ulihi.
Pero, paano ini matabu nga wala kahibalo ang konsumidor?
May ginasiling nga Collective Meter Reading. Apang gakatabu ini nga may permiso sang konsumidor, nga masami dalagku nga mga opisina nga may multiple meters, agud isahon na lang ang reading para mahapos ang pagbayad nila.
Ang problema ugaling kay ang mga naga-reklamo may isa lang, kag indi multiple, ukon madamo, nga mga metro.
Ang panan-aw ta sini nga kon indi gid man depektoso ang metro, ang diperensya posible yara sa nagtalang nga paghatag sang billing sa konsumidor.
Ang contractor sang PECO, nga nagahimu sang billing, posible nga naga-preparar sang mga collective billing sang mga konsumidor para mapahapos ang ila recording kag accounting. Posible nga ang pila sini nga mga collective billing nasal-an nila ipadala sa konsumidor.
Ugaling, wala pa kita nahibal-an nga paathag sang billing contractor sang PECO parti sini.
Kon depektoso gid man ang metro, labi na gid kon sobra kadasig sang tiyog sini, ti ipatan-aw ta, kag kon mapamatud-an nga amo ina ka depektoso, dapat ibalik sang PECO ang sobra nga bayad sang mga konsumidor.
Labay man akon, sang san-o pa gali gin-inspeksyon ining mga metro para mahibal-an kon ga-functionar sing maayo?
Sa Great Britain, sa nabasahan ko sa ila kasuguan nga nag-re-gulate sang negosyo sa electricidad, dapat kada lima ka tuig ang pag-tsek sining mga metro.
Sa nahibal-an ko lang diri sa amon palibut, anyos tyempos na seguro nga wala gid ma-tsek ining mga metro sang PECO.
Ti, ano na ang mahimo sang mga konsumidor nga may reklamo sa sobra nga pagtaas sang ila bill?
Una seguro, i-reklamo ta anay ini sa PECO. Ugaling, sa mga wala salig sa PECO, dapat dalhon nila ang ila reklamo sa independiente nga grupo ukon sa city government, labi na gid sa Iloilo City Council, nga puede magpasar sang ordinansa para tukuron ang isa ka Electricity Meter Ombudsman agud imbestigahan ang reklamo.
Ining meter ombudsman puede man tukuron nga permanente agud maghimu sang regular nga pag-monitor sang billing sang PECO agud madampigan ang interes sang mga konsumidor.
Kon matigayon, kag mahibal-an na ang problema, dayon aktuhan ini.
Kon ang problema yara gid man sa metro, islan ini kag bayran ang mga naga-reklamo sa sobra nga ginsugot sang PECO sa ila, lakip na seguro ang danyos sa kapalpakan sang ila serbisyo./PB
[/av_textblock]
[/av_one_full]
