[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! | Peñaredondo kontra Parcon sa ikaapat nga ti-on’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=’custom’ color=”]
Thursday, April 27, 2017
[/av_textblock]
[av_textblock size=” font_color=” color=”]
SAN-O pa ayhan matapos ang banggianay nanday Kagawad Eduardo Peñaredondo kag Kagawad Armand Parcon?
Sa ikaapat nga higayun liwat naman ginpit-alan ni Peñaredondo si Parcon sa isyu sang ginaalegar patarasak nga pagtampok sang duta sa carabao trail sa Mandurriao malapit sa Anaros Subdivision.
Liwat gintaasan sang tingog ni Peñaredondo si Parcon sa padayun niya nga pag-insister nga dapat may easement nga ibutang ang Anaros. Pero panindugan ni Peñaredondo, ang easement para lamang sa lugar nga may sapa, suba ukon baybay. Bangud wala sang suba sa lugar sala ang paggamit sang tinaga nga easement.
Ang problema suno sa majority floor leader amo nga nagpatindog ang mga tawo sa manubo nga bahin sang lugar gani kun mag-ulan sa ila nagailig ang tubig. Panindugan sang senior councilor nga dapat tampukan sang dakal-dakal ang lugar agud magtaas.
Panghangkat ni Peñaredondo kay Parcon, magdonar sya kay triplehan niya ang donasyon agud matampukan ang manubo nga lugar. Sabat ni Parcon, dapat itugyan sa natungdan nga ahensya sang gobyerno ang problema. Ginpalabtrikan man niya si Peñaredondo nga sa iya panan-awan indi maayo nga aktwasyon sang nauna sa sesyon sang konseho.
Ngaa bala amo na lang ini ang pagtamod sang duha sa tagsa-tagsa? Ngaa bala wala sang ipresentar nga lihok si Parcon sa konseho nga indi pagpit-alan ni Peñaredondo? Kun makapasar man ang ginaduso ni Parcon magaagi anay sa maid-id nga pagsipadsipad sang tagsa ka bahin sang ordinansa man ukon resolusyon. Gikan sa grammar, pagdihon sang sentence, punctuation mark kag sa pagpili sang nagasanto nga tinaga masami makita ni Peñaredondo.
Si Peñaredondo isa sa mga maalam nga konsehal sang syudad. Si Peñaredondo lang ang nakita ko nga makahambal sang impromptu apang matahum ang kaundan sang iya mensahe. Ugaling siguro sa kadugayon na sa posisyon, daw makita mo na ang pagkataka ni EdPen sa iya trabaho.
Sya man ang matuod nga prangka nga konsehal. Wala sya mahadlok magbungat sang ano man nga unod sang iya paminsaron bisan may epekto pa ini sa iya kandidatura.
Si Parcon, sa pihak nga bahin, isa man sa independente nga konsehal sang syudad. Bisan kaupod nya sa partido, wala sya nahadlok magsipak sang desisyon kun sa pamatyagan niya ara sya sa husto.
Amo ini nga natingala kita ngaa indi na gid magsanto ang duha. Siling sang akun kilala, sang una sa kampanya upod pa sila nga duha sa isa lang ka salakyan. Upod nagakaon, upod nagalibot sa barangay. Pero sang sa konseho na hinali lang nag-away.
Pahayag ni Peñaredondo, luyag lamang nila tudluan si Parcon apang matig-a gid ang ulo. Kun si Parcon naman, siling nya indi man sya makahangup ngaa amo na lang ang pagbantay sa iya ni Manong Ed.
Ok man lang nga may kaangay sini sa konseho. Importante nga indi makasablag sa ila trabaho kag magabunga ini sang mas matarong kag mapuslanon nga kasuguan.
Sa sunod nga mga sesyon may kaangay pa ayhan nga matabu? Balantayan naman kay mentras nga indi kuntento si Peñaredondo sa lihok ni Parcon, sigurado may iptanay nga matabu. (jfranco1975@yahoo.com/PN)
[/av_textblock]
[/av_one_full]
