[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading tag=’h3′ padding=’10’ heading=’PAUTWAS! | Ti-on sang pagtingub’ color=” style=’blockquote modern-quote’ custom_font=” size=” subheading_active=’subheading_below’ subheading_size=’15’ custom_class=”]
BY JOEL FRANCO
[/av_heading]
[av_textblock size=” font_color=” color=”]
Thursday, May 25, 2017
[/av_textblock]
[av_textblock size=” font_color=” color=”]
SA PALIPOT kag kibot nga pagsalakay, naagaw sang grupo sang Maute ang syudad sang Marawi. Gin-agaw ang hospital, provincial jail kag pati eskwelahan.
Gin-hostage ang madamo lakip na ang isa ka Ilonggo nga pari. Nabutang sa makatalagam nga sitwasyon ang mga residente. Kun ang military ang pahambalon kontrolado nila ang sitwasyon. Pero ang mga residente sa lugar nagasiling nga indi sila makahulag kag ara sa katalagman ang ila kabuhi.
Bisan ara sa Russia, nagdeklarar sang martial law si President Rodrigo Duterte sa Mindanao agud mapakigbatuan ang mga terorista nga grupo. Nagpauli sang hinali ang Presidente bisan wala pa natapos ang iya state visit sa bag-o nga kaalyado.
Husto kag maabtik ang nangin tikang sang President. Sa sini nga aspeto dapat natun suportahan ang atun lider. Ang grupo kaangay sang Maute wala nagapangilala sang matawhay nga pamaagi sang pagtapos sang problema. Luyag nila ang makahas nga pamaagi agud mas makilala sila sa international community sa handum nga matalupangdan sila sang ISIS.
Ang problema sa atun nga mga Filipino, amo nga sa tunga sang krisis, may ti-on pa kita nga magbinahinbahin. May ti-on pa kita nga dabukan ang baga sang kaakig agud magdabdab ang kalayo. Sa sini nga sitwasyon dapat kita magsentro sa panawagan sang paghiliusa. Bisan ang simple lang nga mensahe sang pagsuporta kag pangamuyo makapaisog sang nagakagha nga paminsaron sang mga kauturan naton nga naipit sining walay kapuslanan nga inaway.
Samtang, sa aton militar kag Philippine National Police siguro maka-question kita. Indi man ini pagpamasol apang palamangkutanon kun ano ang natabu sa intelligence community. Kun pamati-an naton ang siling ni Autonomous Region in Muslim Mindanao governor Mujib Hataman, ngaa bala wala gid matalupangdan ang masobra isa ka gatos nga armado nga grupo nga nagsulod sa Marawi City?
Kun sa Bohol nakita ang 12 lang ka katapo sang Abu Sayyaf ngaa sa masobra isa ka gatos nga Maute group wala gid sang sibilyan nga nakatalupangod kag nag-report sa otoridad? Ngaa nga pila ka oras na ang natabu nga pag-agaw sang syudad antes nahibaluan sang military?
Maathag ini nga lapses sa intelligence sang military kag pulis. Makita nga ginakapankapan na lang sang military kag pulis ang sitwasyon. Bisan sa media lain ang ginahambal sang military kag pulis, lain man ang ginasugid sang mga residente sa lugar.
Sa sini nga hitabu, ti-on na nga mamangkot man kita sa aton kaugalingon bilang ordinary nga residente sang tagsa ka lugar. Nangin mabinantayon man bala kita para sa atun lugar? Indi lang man tani pag-itugyan sang lubos sa military kag kapulisan ang pagpasiguro sang atun palibot. Kita nga mga residente may katungdanan man nga magbantay para sa atun kasiguraduhan. Magbantay sang mga kamala-malahan nga tawo, hitabu ukon aktibidad sa palibot.
Indi lang kita magsalig sa gobyerno kag sa ulihi magpamasol kun may problema na. Mangin kabahin sang kalinungan sang sosyudad, indi mangin rason sang kagarot sang palibot. (jfranco1975@yahoo.com/PN)
[/av_textblock]
[/av_one_full]
