[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | KAANGAY SANG DAHON NGA LAYA’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
Wednesday, May 31, 2017
[/av_textblock]
[av_textblock size=” font_color=” color=”]
Gikan sa mapag-on nga sanga, ang dahon nalaya, sa huyop sang hangin, sa duta nagtupa, kag sa panahon nga nagalipas, ginatabunan ini sang yab-ok kag balas.
Kaangay ini sa poder, sa gahum, sa manggad, kag bisan pa sa mga kadalag-an sa kabuhi. Ang malain man ukon maayo, magapagkit ini sa ino-ino sang tagsa ka tawo. Ang maayo ila dayawon, ang malain ila buyayawon.
Matalupangdan nga ang mga tawo sadto nga nagakalipay sa ila manggad, poder kag impluwensya ang karon nagakipaw-kipaw na, makul-aw na ang igpat sang ila kalag, ang ila konsensya nagakatublag, ang ila nga harakhak nangin makabulungol nga pisngo sa pag-isahanon.
Naglipas na ang panahon, kag kaangay sang tanan nga butang sa kalibutan nga nagalipas, kag sila karon ang nagahinunod na. Mas magansal na sa ila dulunggan ang kalinong sang palibot, mas makabulungol ang huni sang hangin nga nagahuyop.
Sadto sila ang nagahatag sang palapilian, subong sa pagpili sila ang napilitan bangud wala na sang opsyon nga iban kundi ang pagpili sang opsyon nga mas mamag-an, mas indi sila masakitan, mas ila nga masarangan.
Bangud sa puga sang kasuguan, ang ila kalag ang nagahuyang, nag-amat-amat sa pagsungka, sa kapulisan sila ang nagpakita.
Sadtong Mayo 19, ginpresentar ni Punong Barangay Noemi Jablo sang Barangay Desamparados, Jaro ang iya kaugalingon sa Jaro Police Station. Kaupod sini ang iya nga himata nga ginadudahan nga mga drug personalities nga sanday TJ, Bryan alyas Arsap kag tiayon sini nga si April, kag si Rovel Gardose.
Sang tinalikdan nga semana, nagsungka man sa Police Station 1 si Punong Barangay Keith “Dabing” Espinosa sang Barangay Monica-Blumentritt, City Proper.
May tagsa ka rason kon ngaa nagsungka, may hapaw nga pag-aku kag may yara sang nagapanginwala. Apang isa lang ang maathag, lunsay nahadlok kag lunsay napuhag.
Ang tanan may higayon nga magbag-o, ang tanan may higayon nga makapanghugas agud maglimpyo. Nagadepende sa ila ang pagbulig mismo sa ila kaugalingon agud nga mabuligan man sila sang sosyudad naton.
Ang ila kahandaan amo ang mangin palaagyan agud nga sila ang mabuligan kag agud nga matatapan sang kasuguan.
May proseso ang kasuguan, indi sila gilayon makakas sa ila katungdanan, magluwas lamang kon sila ang makasuhan kag mapadutlan sang asunto nga ipasaka sang mga ahensya nga natungdan.
Yara sa kamot sang abilidaran nga PDEA-6 ang pagpasaka sang kaso, sila ang maalam, may ihibalo, kag may poder sa pagpasaka sang kaso. Kabay nga wala sang mantsa ang ila papel kag indi lasaw ang tinta sang ila ballpen. Sila ang ginasaligan sang gobyerno kag sang pumuluyo, kabay nga ila nila kita paglimbungan kabaylo sang ano man nga mga butang. Kabay nga indi sila masilaw agud nga indi sila mabulag.
Aton lauman nga kuntani mangin epektibo sang lubos ang ginahimo sang aton kapulisan nga mapapas na ang pagbaligya sang ilegal nga druga.
Kon amat-amaton sang tiltig ang puno, punggulan sang ugat, mahimo ini nga magalayong, kag madulaan sang higayon nga magdabong.
Sa pagkapatay sang puno, ang mga sinakpan mangin kaangay sang dahon nga laya./PB
[/av_textblock]
[/av_one_full]
