[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! | Hilway ka bala?’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI JOEL FRANCO
[/av_heading]
[av_textblock size=” font_color=” color=”]
Tuesday, June 13, 2017
[/av_textblock]
[av_textblock size=” font_color=” color=”]
“Walang mang-aalipin kung walang magpapaalipin.” – Dr. Jose Rizal
KAHILWAYAN…masangkad nga tinaga nga nagasakop sang malapad nga kahulugan.
Kahilwayan…tinaga nga may kaangtanan masami sa pungsod nga wala sang nagasakop. Pungsod nga mahimo sang mga pumuluyo ang ila gusto sandig sa kasuguan kag kultura.
Matuod kun magsiling kita nga kahilwayan, nagatumod ini sa kahilwayan sang pungsod kaangay sang ginsaulog naton kahapon, Hunyo 12, ang ika-119 ka tuig nga pagsukat sang wagayway sang hayahay sang Pilipinas sa Kawit, Cavite. Sa pangkabilugan amo ini ang atunpagpakahulugan.
Samtang nagasaulog kita sang pungsodnon nga kahilwayan, paano naman ang aton mga personal nga kahilwayan? Bug-os gid bala ang imo nabatyagan nga personal nga kahilwayan? Kun ang pagwagayway sang hayahay simbolo sang hilway nga pungsod, ano naman ang imo dapat iwagayway para sa personal nga kahilwayan?
Ano bala ang kahilwayan para sa imo?
Sa mga imol nga pumuluyo, handum ang kahilwayan sa kapigaduhon. Handum nga maabot ang tyempo nga makapangabuhi man sa bastante nga pagsinalayo nga wala naginapanumdum kun diin naman mangita sang inugbakal sang pagkaon sa masunod nga tigkalaon.
Kun wala ka sang trabaho, kahilwayan naman sa “unemployment” ang imo handum. Nagapanumdom ka na sang ti-on nga nagabaton ka sang imo sweldo makalipas ang isa ka bulan, semana, kinsenas ukon adlaw nga pagtrabaho. Sa minilyon ka mga Pilipino nga wala sang trabaho, indi malikawan nga may mga kauturan kita nga nagasulod sa ilegal nga hilikuton ukon mabiktima sang mga iligalista lamang makakita sang kwarta para sa pamilya.
Sa mga asawa ukon bana nga ara sa magamo nga panimalay, singgit sang dughan, “kahilwayan” sa mapait nga kalibutan. Pila ayhan ka panimalay ang may nagaantos nga bana ukon asawa bangud indi na magsinanto ang panulukan nila nga mag-asawa? Apang bangud nahigot sa sagrado nga papel sang sakramento sang kasal, padayun nga nagahandum sang personal nga kahilwayan.
May mga kauturan man kita nga mga homosexuals nga padayun nga nagapanago sa realidad. Padayun nga ginatago ang matuod nga balatyagon bangud sa kahadlok nga indi mabaton sang sosyodad. Padayun ang ila pagpakuno-kuno lamang nga indi mangin outcast sa sosyodad ukon ila pamilya. Ukon may ara man nga padayun nga ginagapos sang kabutigan bangud indi mabaton mismo ang iya pagkatawo.
Hay, madamo kita sang gusto bayaan. Tagsa sa aton may mga bagay nga gusto naton bayaan agud makabatyag kita sang kahilwayan kag wala na sang ginapaminsar pa nga iban antes maghimo sang tikang. Ikaw nga nagabasa sini sigurado ako may imo man nga ginalukdo nga luyag mo madula kag mangin hilway ka na sang lubos.
Ikaw? Hilway ka bala?
PS: Malipayon lang nga pagbasa kay Toto Hector Espinosa sang Tatoy’s Manokan and Seafoods restaurant nga maukod nga subscriber sang Panay News. (jfranco1975@yahoo.com/PN)
[/av_textblock]
[/av_one_full]
