[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | NAGAKATULOG NGA NAGAMURARAT’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
Wednesday, June 21, 2017
[/av_textblock]
[av_textblock size=” font_color=” color=”]
Kaangay sang isa ka makawat nga nagsalakay sa tunga sang katulugon ang natabo sa banwa sang Maasin. Naglusob ang mga katapo sang New People’s Army nga wala sang dinahum-dahom. Malinong kag matawhay ang pagsulod sa banwa. Nakibot ang kapulisan, ginpangposasan, ginpangbaklid, may gintapakan kag ang ila armas ginpakuha lakip na ang ila mga kwarta kag kagamitan.
Madasig ang pagbuhat sang ila katuyuan. Kaangay sang kilat nga naglabay sa panan-awan, nga nagkurit sa kalangitan, nga nag-igrab sa panulokan.
Nagpakuno-kuno ang mga babaye nga magapa-blotter sa kapulisan, sang nakita ang sitwasyon ila gilayon nga gintimbrehan ang ila kaupdanan nga nagdinaguso sa pag-raid sa police station.
Makabig nga ginlita nila ang mga pulis agud nga matuman ang ila tuyo. Mahimu nga nangin mahuyang ang pag-amlig sang ila seguridad rason nga sila ang nalutsan sang mga rebelde.
Nangin kampante kag nasobrahan sang kumpiyansa ang mga pulis sa Maasin. Kahibalo ang tanan nga yara sa idalom sang full alert status ang tanan nga uniformed personnel sa bug-os nga pungsod. Kahibalo man ang tanan nga may pamahog gikan sa NPA nga maga-atake sila, kag ginpaandaman na ang mga police station sa bug-os nga probinsya nga mag-alerto kag magpanghanda. Apang sa pihak sang paandam, nangin kampante kag nabuyo ang kapulisan sang Maasin kag ini ang nakita nga higayon sang mga rebelde nga sila ang sudlon kag agawon ang ila mga armas.
Mabudlay magpati sa pahayag sang mga rebelde bangod nga bisan may yara sang peace talks ang ila mga mataas nga lideres apang indi mapunggan ang ila kalakasan.
Tuhay ang ginahimu sang mga negosyador, tuhay ang ginahimu sang mga hangaway.
Maathag nga indi dapat magkumpiyansa sa mga rebelde. Kon may bendisyon sa ila mataas nga lideres ang ila ginhimu, maathag nga indi sila seryoso sa pag-angkon sang kalinong kag uyang lang ang ila pag-upod sa peace talks. Kon wala sang bendisyon sa ila mataas nga lideres ang ila ginhimu, maathag man nga nagamato-mato lamang sila kag wala sang kontrol ang ila mga lideres sa ila mga hulag.
Indi man naton mabasol ang mga tawo kon ngaa wala sila nakatimbre sa kapulisan angot sa hulag sang mga rebelde. Madamo sa ila ang nakibot sa hinali nga hitabu. Madamo sa ila ang wala nakalaum nga mga rebelde ang ila nakita bangod kaangay nga mga soldado kon sila ang lantawon. Nasal-an sila nga mga soldado bangod sa ila mga porma, salakyan, armas kag sa ila hulag.
Ginatun-an sang mga rebelde ang mga pamaagi kon paano lutsan ang ila kasumpong, ila ginabantayan paagi sa social media kag ang mga pahayag sang mga opsiyal sa mainstream media.
Samtang ginabulad sang kapulisan ang ila mga plano sa idalom sang masanag nga bulan, nagalili man ang mga bitoon, nalipay kag nagayuhom bangod ila na madihon ang ila pagahimuon.
Dapat nga magtuon sang leksyon ang kapulisan angut sa ila kahuyang. Wala nagakatulog ang kontra. Mas delikado kon lipod sila sa aton mata.
Magapadayun ang lihok sang mga rebelde samtang may kapulisan nga nagakatulog nga nagamurarat./PB
[/av_textblock]
[/av_one_full]
