[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
NAKASAMBOD
Mabudlay makalampuwas sa isa ka sitwasyon kon ang imo kaugalingon nangin paon sang higayon kag kon nakasambod na sa lawa sang kahangawa.
Apisar sang paghimakas nga makagwa sa sini nga kahimtangan apang naputos ka na sang lawa kag ang nagputos sa imo nagahana nga lamunon ka kag utdon ang imo pagginhawa.
Kaangay ini ang sitwasyon sa natabu sa duha ka persona nga sanday Jonathan Peñafiel kag Michael Malones.
Natublag ang tanan sang liwat nga mabatian nga may yara naman sang duha ka tawo nga nasapwan nga nahal-id sa higad sang dalan sa Barangay Tiring, Cabatuan, Iloilo.
Gintukib sang mga kapulisan ang hitabu kag natumod ang mga biktima apang wala pa sang maathag nga ideya ang kapulisan kon kanday sin-o ang naghalit sa ila.
Ginahaum-haum nga posible may kaantanan sa ilegal nga droga ang nangin kamatayon sang duha ka persona.
Kon matuod ang teorya sang kapulisan nga ang mitsa sang ila kamatayon amo ang ilegal nga droga, makasiling kita nga wala pa napapas ang mga hurong sa Iloilo. Padayun sila nga nagahiwat sang ila lihok, padayun ang ila negosyo, padayun ang ila paghatag sang huol sa komunidad kag padayun ang ila hilikuton nga wala sang pagkatublag.
Tubtob nga indi madakpan si Richard Prevendido, nagapati ang mga sindikato sang ilegal nga droga nga paslaw ang kapulisan, nga wala sila sang may mahimu kag kulang sila sa paghimakas agud nga mapasabat ini sa akusasyon batok sa iya.
Tubtob nga may dalok sa kwarta nga mga katapo sang Philippine Drug Enforcement Agency (PDEA), padayun ang pagsagsag sang ilegal nga droga. Kontani balikdon man sang gobyerno ang malagba nga kuko sang iya mga tinugyanan nga amo ang nagakaros sa dungog nga iya ginahalongan.
Samtang may pulis nga kahimbon sa sindikato, padayun ang pagkatublag sang sosyudad, may mga matabu nga indi naton mapaathag, kag padayun sila nga magahalit sa komunidad.
Apisar nga ginapanginwala sang tagsa nila ka himata ang kahilabtanan sang duha ka biktima sa ilegal nga droga, apang ang mga sirkumstansya nagatudlo supak sa sini nga mga panimuot.
Bisan pa nga nagbiya na sila sa ila nangin hilikuton sadto, apang ang pat-in sang ila nahimuan ang wala napanas sa paminsaron sang mga natungdan, sila ang ginmarkahan, sila ang gintutokan kag sang nakakita sang higayon sila ang ginhalitan.
Matuod nga mabudlay kakason ang lawa nga nakasambod na sa imo kaugalingon, nagapilit sa imo nga unod, nagawayway sa imo nga panimuot kag nagapatimaan nga ikaw isa ka paon nga ginatuntun sa tigawnan agud nga tukbon.
Ginapanugyan naton sa tanan nga maglikaw sa landong kag presensya sang ilegal nga droga agud nga indi mapanas kaangay sang aso nga nagakadula sa huyop sang hangin.
Ginapahanumdom naton nga ang kahoy nga natomo sa tubig, sa kalayo indi pag-ipalapit bangod kon ini ang magaang sa isa ka pagdila sang kalayo ini ang maduktan.
Ang natabu sa ila isa ka daku nga palaligban sa kapulisan. Kabay nga mapasabat ang taghimu sang krimen.
Mangin maalam sa pagbasa sa sitwasyon. Indi magpaganyat bangod mabudlay makalampuwas kon ikaw ang nakasambod./PB
[/av_textblock]
[/av_one_full]
