[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’LABAY MAN AKON ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=”]
BY RUNJI ROCIO JAMOLO
[/av_heading]
[av_textblock size=” font_color=” color=”]
Monday. September 25, 2017
[/av_textblock]
[av_textblock size=” font_color=” color=”]
TUMALAGSAHON lang ako nagapa-terminal bangud malaka man lang ako magbyahe.
Ang ulihi ko nga “terminal experience” amo ang sang Sabado sang gab-i padulong sa Buenavista, Guimaras.
Naghingagaw pa ako sang last trip para makaupod ang akon mga abyan (mga anay classmates ko kag Class 1976 batchmates sa Iloilo High School) sa paghangawhangaw sa pihak nga isla. Sang aga sang Sabado, nakaupod na ako sa ila apang nagbalik lang sang udto bangud may ginteka/may gin-asikaso balik sa syudad sang Iloilo.
Daw sa kahapos na gid karon magbyahe sa tunga sang Guimaras kag Iloilo bisan pa nga nag-ulan pa sina nga kaagahon…kag nagpaandam pa ang National Disaster Risk Reduction and Management Council nga magamunog pa gid ang ulan sa sulod sang duha tubtub tatlo ka oras.
Delikado ang magbyahe nga nagaulan, paandam pa sang iloy ko. Apang bangud gusto ko, namedyusan man. Dugaydugay niya “ring” ang cellphone ko, amo man ang akon paseguro sa iya nga safe kag matawhay ang tanan.
Ang kahangawa sang iloy ko (seguro) nasandig sa iya sadto pa namat-an nga mabudlay ang pagbyahe sa pumpboat kon maulanon ang panahon.
“Wala sang gale warning ang PAGASA,” paseguro ko sa iya. Magluwas sina, nakabantay ang mga taga-Philippine Coast Guard.
Kon nag-worry siya sang pagtabuk ko sa Guimaras sang aga, mas nga natublag siya sang pamat-ud ko nga magbyahe mga pasado na las nueve sang gab-i. Ginpasalig ko siya nga yara ako sa sulod sang terminal sang pumpboat sa Parola.
Madamo ang PUJ Jaro CPU Derecho nga nagapasulod sa Parola para magdul-ong sang mga pasahero. Mas madamo pa gid ang mga taxi.
Nagahimos na nga magpanirado ang mall sa kilid sina apang nagabanaag gihapon ang mga suga nga nagadula sang katahap sang posibilidad nga may mahimo nga krimen. Nagabantay pa gihapon ang mga security guards sa gua sang mall. Sa kilid sini ang terminal, ginabantayan man sang mga gwadya samtang masako ang pagpaninlo sang maintenance crew.
Wala sing dapat kakulbaan bangud masanag ang palibot kag visible ang mga pulis sadtong dis oras na sang gab-i.
Katawhay lang nga maghulat sang imo byahe sa terminal sang pumpboat sa Parola. Matahum ang lugar. Bright ang colors sa sulod sang waiting area nga nagapasadya sang atmosphere. May sudlan ka nga toilets. Matinlo ang mga basin. May available nga tissue paper kag may tubi sa gripo.
Wala ako natublag samtang nagahulat sa akon kaupod kay safe ang lugar, magluwas nga ginpasalig nga ginahulat pa nila ang mga empleyado sang mga malls nga nagahingagaw pa pauli pakadto sa Buenavista.
Daw kasan-o lang nga nangin kontrobersyal pa ang Iloilo-Guimaras Ferry Terminal (IGFT) apang “water under the bridge” na ang tanan karon matapos nga gin-settle na sang Guimaras kag Iloilo City ang ila issues.
Ang “terminal” isa ka estasyunan sang public carrier, sa masami yara sa syudad ukon sa airport kon sa diin ang mga pasahero nagasaka o nagapanaog.
Nakabyahe man ako sang malawig sang nagligad nga summer, Iloilo padulong sa Manila. Sa akon pagbalik, gin-experience ko ang travel paagi sa “roll on, roll off” ukon roro. Magluwas nga magutok ang terminal sang nasakyan ko nga busliner, wala sang husto nga kasilyas. Apang ang terminal sini diri sa syudad sang Iloilo nga yara sa Tagbak, Jaro bastante sang kasilyas kag lugar nga talambayan sang mga pasahero.
Ang terminal sang PPA sa Loboc, La Paz para sa mga sumalakay sa fastcrafts padulong sa Bacolod City daw sa agrabyado kay ang lugar indi available nga talambayan o hululatan sang mga naalangan nga mga pasahero kon mabagyuhon nga panahon. Ginapa-maintain ang terminal sa isa ka pribado nga management team. Gani bahala na kon ikaw naalangan, ang terminal wala nila ginaabrihan.
Ginatawag naton ang PPA bahin sini bangud ang terminal indi negosyo kundi lugar nga hululatan para sa masunod nga available nga fastcraft, pumpboat o salakyan. Sa terminal dapat kaayuhan kag kasulhayan sang pasahero ang una nga bantayan. (runjirjamolo@gmail.com/PN)
[/av_textblock]
[/av_one_full]
