[av_textblock size=” font_color=” color=” av-desktop-hide=” av-medium-hide=” av-small-hide=” av-mini-hide=” av-medium-font-size=” av-small-font-size=” av-mini-font-size=”]
[/av_textblock]
[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’NOVIE ONDICE Ika-3 nga gua ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”][/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Luyag man sabton ni Vicente nga utang niya sa pari ang iya kabuhi, naghipus na lang sia. Ayhan, indi mahangpan sang asawa ang daku nga utang-nga-kabalaslan sang pamilya Ondice kay Padre Francisco. Nagsalimuang sa kaakig si Norma. Daw bulkan nga nagbagrot. “Talawit ka! Inutil! Talawit! Pendeho!” Isa ka tampa ang ginpadapat ni Vicente sa iya asawa. Kag wala na liwat nagpakighambal sa iya si Norma. Bisan ginpang-gua-an na sia sang tubi agud magbun-ag, wala gid nangayo sang bulig si Norma kay Vicente. Nagmatu-mato na lang sia tawag kay Lola Demetria. Ginbaton sang bana ang tanan nga pagpanukmat. Ang mga apa nga pamasol sa mga mata ni Norma. Ginbatas ni Vicente ang tanan. Ginlukdo nga daw krus ni Ginoong Hesus. Pati ang kaakig sa pari. Ginhuptan niya sa iya tagipusoon ang kalain sang buot kay Padre Francisco nga nagpendeho sa iya. Ginhinago niya ang mga nabatyagan nga kaluoy para kay Novie. Ang mga kasubo. Ang tanan nga mga pagpanglibak sang iya mga kasimaryo, ginhigtan niya sa iya dughan. Gin-gapos niya ang tanan nga pagyubit kag pagpakahuya. Apang ano kadaku ang kasing-kasing agud punggan ang pagwarasaag sang nagasalimuang nga mga balatyagon? Kon daw demonyo nga nagapanginpadlos ang mga kaakig, kaugot, kag kahuya, mapunggan bala ang pagbusdik sang dughan? Ano nga mga bangungot ang nagasabwag sang kahadlok sa mga kagab-ihon sang isa ka tagipusoon nga ginatublag sang kaluoy, kahuya, kag pagtimalos? Ano nga mga malain nga damgo ang nagaduaw sa kasing-kasing nga daw mabungol sa nagasinggitanay nga mga balatyagon? Nagabangigay nga mga kahuy-anan kag kawalay-huya? Nagayaw-yawanay nga kaakig, kahadlok, kag dumot sa pagtimalos? Isa ka adlaw, Setyembre 11, 1907, ikasiyam nga kaadlawan ni Novie, wala na nakabugtaw si Tatay Vicente. Suno sa embalsamador, lanog kuno ang kasing-kasing sang bangkay. Daw karne nga gintuktok sang pino. * Sa belasyon ni Vicente, liwat nga naburikat ang ginhalinan ni Novie. Gikan sa bibig sang mga bata, ginsinggit ang ginahutik-hutik kag ginahuna-huna sang mga tigulang. “Novie, matuod bala nga si Padre Francisco ang imo amay?” sunlog sang isa ka bata. “Paano n’ya gintira ang nanay mo? Patalikod?” dugang pa sang isa. Nagkilinadlaw ang mga bata. Nagpakuno-kuno nga naeskandalo ang mga tigulang. Gin-akigan ang mga bata. Ginpapauli. Kag amat-amat man nila nga gintalikdan ang belasyon. Naghulag ang lungon ni Vicente. Nag-uyog. Nagtay-og nga daw nagapalangudog sa kaakig. Blangko ang mga mata nga nagatulok lang sa isa ka kilid si Nanay Norma. Nagtulo ang luha ni Novie. Nagdalagan sia sa sapa nga masami nila ginakadtuan sang iya amay-amayan.
Ang sugilanon nga “Novie Ondice” ni Peter Solis Nery ginsulat antes pa ang 2004. Nakaangkun man ini sang iban nga tig-ulo kasubong abi “Matalinga.” Para sa iban pa nga sinulatan ni G. Nery, visitahi ang iya website: www.petersolisnery.com. Madamu gid nga salamat.
[/av_textblock]
[/av_one_full]
