NOVIE ONDICE Ika-5 nga gua

[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]

[av_heading heading=’NOVIE ONDICE Ika-5 nga gua’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”][/av_heading]

[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Isa ka bes, sang tuig nga nagbisita ang kometa nga ginakilala subong bilang Halley’s comet, daw wala na sa kaugalingon ang pari. Pagkatapos nga pagkatapos gid sang ambahanon sa pagsugod sang misa, ginbendisyonan gilayon sang pari ang mga nagsililimba. Indi pa kuntani maghalin ang mga tawo. Apang ano pa ang mahimu nila isugpon sa panghingapusan nga “Amen”? Nagtukar si Señor Villareal sang ambahanon sa pagpauli. Napilitan nga nag-ginuwa sa simbahan ang mga tumuluo.

Sadto nga Domingo, nagpalauli ang mga tawo nga nagalingin ang ulo.Nagapamuyayaw.Nagapangyaguta.Nagakilinadlaw.Nagapanglibak.Nagalungo ang ulo.

Sadto man nga Domingo, sa tunga sang pagkinagamo, natalupangdan ni Ariel nga mapilit ang panulok ni Sebastian kay Corazon. Kag matam-is man ang yuhum sang iya manghod sa nahamtangan sang organ. Nahibaluan ni Ariel nga indi para sa iya ang mga yuhum ni Corazon. Indi man para kay Señor Villareal.

Nakabatyag sang tuman nga kahangawa si Ariel. Nakabatyag sia sang kahadlok.

*

Sumugod sang nagtungtong sia sa edad nga katorse, markado na sa bug-os nga baryo nga si Corazon Loredo amo ang bulahan nga babaye para kay Luis Mucho. Ang matuod, ginapangaluyagan pa lang ni Luis si Corazon. Apang sin-o ang mangisug agud karibalon si Luis?Sin-o ang makabato kay Luis Mucho?Mas madamu pa ang mga baka sang mga Mucho sang sa bug-os nga populasyon sang baryo. Idugang pa, sa Matalinga, kon sin-o ang una nga nagpabutyag sang pag-angkon, sia ang ginahatagan sang kinamatarung. Kon sin-o ang una nagbantala sang pagpanag-iya, sia ang ginahatagan sang ligwa.

Luyag ipahanumdum ni Ariel kay Sebastian ang mga butang nga ini. Duha na lang sila ang nabilin sa simbahan. Kasubong sang masami nila ginahimu sa sulod sang napulo na ka tuig, nagpangawat naman sila nga magtukar sa organ-kawayan.

“Ginahigugma ko sia,” tuad ni Sebastian nga nagabadlak ang mga mata. Tuman kasingkal sang iya balatyagon para sa manghod ni Ariel. Nagtuga ini sang pag-idlak-idlak sa iya mga mata.

“Indi sia nagakabagay sa imo.Natigana na sia para kay Luis.”

“Basta, ginahigugma ko sia!” Kag padayon lang nga nagtukar si Sebastian sa organ-kawayan. Nagpirik ang iya mga tudlo.Matahum nga mga tulalay ang iya gintukar.Bag-o nga mga lanton.Langitnon. Wala pa nabatian sa bug-os nga Matalinga.

Sa musika ni Sebastian, nabatyagan ni Ariel ang makusog nga mga balatyagon. Gugma.Kaalipungot.Kailigbon.Himaya. Nagtulo ang luha ni Ariel. Nahibaluan niya nga sia lang ang abyan ni Sebastian. Sia, kag sia gid lang! Tungod sia lang ang nangahas nga maglalis sa mga tigulang nga nagdumili sa mga kabataan sa pagpalapit kay Sebastian. Sia lang ang nakighampang sa “Anak-ni-Satanas”. Sia lang ang kakutsaba ni Sebastian nga magsulod sa simbahan agud mangawat sa pagtukar sang organ-kawayan. Samtang didto sa buluthuan si Señor Villareal kag ang iban nga mga kabataan, nagapabilin sila sa simbahan.

Ang sugilanon nga “Novie Ondice” ni Peter Solis Nery ginsulat antes pa ang 2004. Nakaangkun man ini sang iban nga tig-ulo kasubong abi “Matalinga.” Para sa iban pa nga sinulatan ni G. Nery, visitahi ang iya website: www.petersolisnery.com. Madamu gid nga salamat.
[/av_textblock]

[/av_one_full]