[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Sablag sa lalantawon’ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’18’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
BY ROBERTO ‘BERT’ LADERA
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Thursday, March 8, 2018
[/av_textblock]
[av_textblock size=’18’ font_color=” color=” av-medium-font-size=” av-small-font-size=” av-mini-font-size=” admin_preview_bg=”]
MANAMI magbiyahe sa higad sa mga lugar nga malapit sa baybayon bangud makita mo ang dagat nga makapamag-an sa imo nga pamatyag.
Malaba ang bahin sang syudad nga nagaatubang sa dagat bangud mismo ang city proper sang Iloilo napalibutan sang tubig dagat.
Isa ini ka daku nga manggad nga dapat amligan sang aton mga nagapangalagad sa banwa kag dapat nga magpaminsar sila sang mga pamaagi kon paano mapreserbar ang ini nga sitwasyon, kon paano magamit bilang atraksyon kag kon paano makaganar ang syudad paagi sa pagdugok sang mga turista.
Nangin sentro sang kauswagan ang distrio sang Mandurriao, tuman na ka gutok, tuman na ka bug-at kag halos nagapaindis-indis lang ang mga istruktura sa pagbutyog pasaka, sa pagpahuman sang mga edipisyo nga ginatangla, kag halos daw nagakatahap na ang ordinaryo nga pumuluyo nga magtapak sa duta nga sementado kag naga-inggat nga sadto napuno sang lutak.
Maabot ang panahon nga ang tawo matak-an na, masum-uran ukon maluod sa iya kahimtangan, sa kagutok sang trapiko, sa kadasig sang paglipas sang panahon, kag napun-an sang komersyalismo nga pagsinarayo. Magapangita siya sang paaliwansan, lugar nga malinong, lugar nga magahatag sa iya sang bag-o nga kusog, lugar nga magabulig sa iya sa pagpakighimbon sa mabugnaw nga palibot.
May yara kita sang mga lugar nga mahimo naton hatagan sang pokus magluwas sa Mandurriao nga halos gutok na.
Dapat naton hatagan sang maayo nga plano ang aton coastal area gikan sa La Paz padulong sa Jaro. Tun-an kon paano naton mapreserbar ang ini nga lugar nga naga-atubang sa dagat kag nagatamwa sa isla sang Guimaras.
Nabuyo na ang aton mga opisyales sa syudad sa pagdayaw kag paghatag sang atensyon sa distrito sang Mandurriao. Nalipatan nila nga ang mga bodega sa coastal road ang daw kaangay sa mga uhong nga naga-ulhot. Ginatabunan nila ang maayo nga lalantawon nga isa ka manggad kag bugal kon patin-aron kag tutukan sang syudad sang Iloilo.
Kaangay sang iban nga lugar, ila ginahatagan sang pagtamod kag pagpatin-ad ang ila coastal area. Ginaplanuhan nila kon paano mapatin-ad ang lugar, kon paano mapanami, kon paano mapuslan agud nga mangin alternatibo nga lugar nga mapadulungan kon luyag nila nga mag-relax kag magpalayo sa magarot, magahod kag makapoy nga palibot.
Dapat nga dumalahan sang syudad ang mga lugar nga ginapatindugan sang mga bodega. Dapat may yara sang limitasyon sa kon diin lang sila kutob kag agud nga indi nila matabunan ang tanan nga lugar.
Dapat nga magmuklat na ang City Planning and Development Office. Balikda ninyo ang coastal area nga ginakamasa sang mga bodega, nagaptuyang sila sa pagpatindog kag wala sang may nagasaway sa ila ukon nagapahanumdom sa ila sa kon ano ang nagakadapat.
Kuntani makalab-ot man sa igdulungog ni Mayor Jose Espinosa III ang ini nga sentimento agud nga mausisa kag matun-an kon ano ang maayo.
Indi naton pag-ibaylo sa mga bodega ang maayo nga lalantawon nga mapabugal naton. Dapat subong pa lang maaktuhan na kag matapna sang syudad.
Hawanan naton ang sablag sa lalantawon. (bertladera_rmn@yahoo.com/PN)
[/av_textblock]
[/av_one_full]
