[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Nagapamukadkad’ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’18’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”]
BY ROBERTO ‘BERT’ LADERA
[/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Sunday, March 11, 2018
[/av_textblock]
[av_textblock size=’18’ font_color=” color=” av-medium-font-size=” av-small-font-size=” av-mini-font-size=” admin_preview_bg=”]
MAY HIGAYON ang tanan nga yari sa kalibutan, may tion nga natigana para sa tagsa-tagsa kag may maayo nga matuga ang pagtinguha sa idalom sang butlak sang adlaw.
Nagaabot na ang tion sang pagtindog nga may bugal, nagagapa sa kuton sa iya malab-ot nga kasangkad, kag naga-amat-amat na dabong agud nga makahatag sang komportable nga handong.
Madamo sang bokol kag ang iban nagbukad na, maanyag ang resulta, makagalana sa mata. Madamo sang nagabalikid, kag madamo man sang naga-ulikid.
Kaangay sini ang aton paglaragway sa kahimtangan sang syudad sang Iloilo. Gikan sa nagahana nga magbukad tubtub sa karon nga nagapamukadkad. Madamo na ang nagadayaw sa iya kahimtangan, madamo sang nagakaganyat nga siya ang mapadulungan.
Daku ang mabulig sang bag-o lang natapos nga trade mission sang British Chamber of Commerce in the Philippines sa pagpili kag pagkilala sa Iloilo bilang pinasahi nga lugar kag angay nga pahamtangan sang ila nga negosyo.
Madasig nga pagtin-ad ang aton ginaaguman apisar sini ang aton sinadto nga mga manggad ang wala nagakawigit. Indi dapat mapanas ang aton marka bilang mga Ilonggo bisan pa nga nagabutyog ang aton ekonomiya.
Angay lang nga balansehon naton kag indi pag-iwigit ang aton kinaiya, ang mga bagay nga bisan dumaan na apang amo ang sa aton nagapakilala sa ila. Dapat magapabilin ang aton pinasahi nga mga manggad, kultura man ukon istruktura nga amo ang sa aton nagapakilala bilang mga matuod nga Ilonggo.
Ipakita naton ang aton kasampaton sa pagdumala sa nagasulod nga mga negosyo madasig nga pag-uswag. Ipaaalinton naton nga tuhay ang mga Ilonggo sa pag-atipan kag pag-amlig sa mga bisita kag sa pagsuporta sa mga negosyo nga nagahatag sang benepisyo sa mga Ilonggo.
Kuntani magabunga gid ang pagpadulong sang mga negosyante nga Briton diri sa syudad sang Iloilo. Kuntani liwat nga magdabdab ang nagbugnaw na nga balatyagon bangud sa dapya sang malamig kag malwig nga higayon nga halos nalipasan man sang panahon.
Liwat nga ipatudok kon ano kainit ang aton relasyon sa ila bisan sadto pa nga panahon, santu man sa ginatuaad sang maragtas.
Kanugon sang iban naton nga mga hinimuan kag mga ginpangtun-an kon indi mahatagan sang kahigayunan nga magamit para sa kapuslanan sang tanan.
Tion na nga patin-aron pa gid ang aton turismo, ang agri-business, ang manufacturing, ICT-BPM, kag research and development ukon ang academe nga mapuslan ang ila mga ginahimo nga pagpanalawsaw ilabi na sang ila extension program.
Madamo kita sang potensyal nga mahimo gikan sa aton halos wala ginatalupangod nga ikasarang, mga pagpanalawsaw kag mga pagtuon. Dapat na nga hatagan sang katumanan kon mabuligan sang mga negosyante nga Briton.
Yari na kita sa tion sang pagkilala, pagtalupangod kag paghatag sang importansya sang mga negosyante diri sa lokal kag sa luwas. Indi na mahawiran pa ang padayon nga pagbutyog sang ekonomiya. Dapat lang nga maghugpong kita apisar nga may yara sang kinatuhay sa anuman nga bagay, kabigon ini nga kusog agud mangin tayuyon ang pagbutyog.
Amligan ang Iloilo, abonohan sang pagpalangga kag pag-ulikid agud tayuyon nga nagapamukadkad. (bertladera_rmn@yahoo.com/PN)
[/av_textblock]
[/av_one_full]
