PAGKATAPOS nga nag-anunsyo si Cong. Jerry Treñas nga madalagan siya pagka-meyor sa 2019, hinali lang naglibagon ang sonata sang mga hitabo sa Iloilo City government.
Ginpatawag na ni Mayor Joe Espinosa ang mga executive assistants (EA) nga sadto identified kay congressman kag gin-pamangkot sila kon bala makasuporta pa sila sa mga programa kag polisa sang meyor.
Ining mga EA nga sadto identified kay congressman amo sanday Melchor Tan, Nuens Mitch Antiqueña, Rodolfo Alejano, Irene Ong, ICUPAO head Roy Firmiesa kag Boyet Rico.
Sa wala sing duha-duha, ining mga EA ni Congressman Jerry nag-sumite na sang ila courtesy resignation sugod sadtong Marso 9.
Indi seguro tungod wala sila luyag kay Mayor Joe kay dugay man ang pag-ugyon sa pulitika nanday Mayor Joe kag Congressman Jerry, kundi tungod lang seguro sa delicadeza.
Isa pa, mas daku ang ila kabalaslan kay Congressman Jerry sangsa kay Mayor Joe tungod sa kalawig kaayo nga pagserbe nila sa nahauna nga indi nila mabale wala.
Ipangamuyo na gid lang nila seguro nga sa ulihi mag-upod ang duha sa pag-serbe sa banwa sa gihapon – nga si Congressman Jerry madalagan meyor kag si Mayor Joe magpaiway kag magdalagan congressman.
***
Samtang, padayon man ang panilagay sa City Hall sa kon diin bala makadto ang lealtad sang mga empleyado. Wala seguro sing problema sa mga casuals. Pangabuhi ina ang ila, kag ang ila kabalaslan yara gid lang sa ila survival kag wala seguro sing magabasol sa ila kon mag-upod man dayon sila kay Mayor Joe.
Medyo may problema ugaling sa pagtulod paibabaw sang mga regular nga mga empleyado. In fact, ang mga opisyales nga may appointing/recommending authority sa idalom ni Mayor Joe nagahingagaw na gani nga makaplastar sang ila bata-bata sa mga bakante nga pwesto sa karon, kay indi man makaparan ni Mayor Joe ang iya tanan nga obligasyon. Tama na seguro nga magpirma siya sa rekomendasyon sining mga opisyales sa nagakalain-lain nga departamento.
Kilala nga “fair and just” si Mayor Joe sa iya mga dealings, kag indi niya luyag himuon ang indi maayo labi na gid ang maglapas sang kasuguan.
Puede ugaling mapabangdan si Mayor Joe, tungod sang iya poder, nga himuan medyos nga ipataklad sa maayo nga pwesto ang iya nahamut-an kag iwigit ang na-identify sadto kay Congressman Jerry.
Samtang, sa matuod, ang ginasugid gid nga nagahimo sining anomaliya amo ang pila pa ka department heads. Ginahimo nila ini sa paghatag sang mga oportunidad sa mga nahamut-an nila kag paglikom sining oportunidad sa indi nila ka-ugyon.
Gapati ugaling kita sa pagka-matarong ni Mayor Joe kag indi niya himuon ini kag sundon ang kasuguan. Labi na subong sa administrasyon ni Presidente Duterte nga kontra gid niya ang graft and corruption.
Kontra ni Presidente ang anomaliya kag wala siya pili iguon, labi na gid kon ginapahibalo ukon ginareklamo ini sa iya.
Ti, ano gid bala ang indi dapat himuon sang mga appointing/recommending authorities agud indi makalapas sang mga pagsulundan sa pag-appoint ukon pag-promote sang mga empleyado?
Ang Civil Service Commission, sa idalom sang CSC Resolution 010114 nga napetsahan sadtong Enero 10, 2001, nagadumili sang diskriminasyon sa pagbaton sang mga empleyado.
Sunu diri, “ang tanan may pareho nga kinamatarong sa pagpang-empleyo, lalake ukon babaye ka man, kon bala kasado ka ukon indi, may sablag pisikal, kon ano man ang imo relihiyon, kon sa ano nga tribu ka naghalin (ethnicity), ukon ano man ang imo kolor sa pulitika.”
Ang nahibal-an naton nga makapagusto ang yara sa poder sa mga pwesto nga pulitikal, or ining mga pwesto nga “at the pleasure of the appointing authority.”
Ang Civil Service nagasiling man nga ang appointment sa gobyerno bukas sa tanan nga cualificado sa “merit kag fitness.”
Gani kwidaw gid, kamo nga ginatagu-tagu ang mga bakante nga pwesto para indi kahibalo ang iban, labi na gid kon career service, para lang sa inyo ka-relihiyon, kaugyon sa pulitika kag sa ano pa nga rason nga supak sa pagsulundan sang Civil Service.
Basi may mag-reklamo sa inyo anomaliya kag magsumbong kay Presidente Duterte, abaw! Indi gid kay madisgrasya gid kamo bisan kaugyon kamo niya.
Ano be sa inyo, paryente kag pareng tunay? (w_mateojr@yahoo.com/PN)
