WALA sang nakasulat nga pagsulondan sa alyansa sa politika.
Wala sang standard nga dapat tumanon ang mga politico. Amo ini nga wala sang kasiguraduhan sa pag-abyanay sang mga politiko. Kun sa hulobaton pa, “Wala sang permanente nga alyansa. Pero permanente nga interes may ara.”
Basta nagakabuhi ka sa kalibutan sang politika wala ka sang permanente nga abyan. Ang ginasandigan lang amo ang palabra de honor kag katampad sa ginabungat nga pasalig sang tagsa-tagsa ka politiko.
Problema lang kay pila lang ayhan ang may palabra de honor kag may katampad sa ila mga ginasaad?
Ini ang kabangdanan kun ngaa wala sang makapugong kay suspended congressman Jerry Treñas nga magpadalagan liwat bilang alkalde sa syudad. Apisar ini sang una niya nga pahayag nga indi na sya magpadalagan bilang alkalde.
Sin-o man abi ang makapugong sa iya? Kuntani ang iya na lang palabra de honor kag pagdumdom sang iya ginbuy-an na nga mga tinaga sa publiko.
Kun wala sang makapugong kay Treñas nga magpadalagan bilang alkalde sang syudad, ngaa gusto nila punggan si Mayor Jose Espinosa III nga magpadalagan para hatagan sang alagyan si Treñas?
Ngaa ang iban ang magasulat sang pagsulondan kun ano ang usoyon nga banas sang politika ni Espinosa?
Kun ang iban nagaambisyon nga mangin alkalde, ngaa indi pwede si Joe III?
Indi man patas nga hambalan si Joe III nga mahuyang nga kandidato. Sin-o sila nga magsiling sina? Ano ang ila talaksan nga mahuyang ang alkalde?
Ang survey sa kinaandan gina-commission sang iban agud pamakuron ang ila pagpati. Syempre kay gusto sang iban magdalagan, paggwaon nila nga mahuyang ang alkalde. Apang dapat paminsaron sang tanan nga si Joe III ang nagapungko nga alkalde subong. Kun alkalde ka kag ikaw ang nagaposisyon, dako ang mahimo mo agud mabag-o ang senaryo sang pamulitika.
Indi na makapaiway si Joe III bangud sya ang mayor subong kag sang una pa, ini na ang iya nahuman nga plano santo man sa pasalig sang grupo. Sin-o pa ang marespeto sa iya kun magpaiway sya para hatagan sang alagyan ang kasakun sang iban sa poder?
Sigurado, handa naman ang alkalde sa sini nga plano. Bisan pa nga hambalon nga indi pa mabakod ang iya grupo, panan-awan lang ina sang iban bangud sila may handum man sa posisyon.
Ngaa indi makapaiway si Joe III?
Ini bangud nga ti-on na niya nga mangin alkalde sang syudad paagi sa election. Ang nagakatabu subong sa politika ayha, makabig nga “kagustuhan sang Dyos.” Kun ano man ang ginapungkuan ni Joe III subong ayhan bugay ini sang Makaako sa iya.
Sa mga kaupod sa politika ni Joe III…tahura man ang ti-on niya subong. Naglipas na ang inyo, mabalik pa kamo? (jpranco1975@gmail.com/PN)
