PASULOD na kita sa Semana sang Pagkabalaan. Panahon sa pagpamalandong.
Masadya kita kay tatlo ka adlaw lang ang aton trabaho. Laban-laban gani basi taguri lang ang aton obra kay kon kaisa sa kaalwan sang aton mga employers ginapapauli kita sang temprano agud makahingabot pauli sa aton mga natungdan nga banwa o probinsya. Ang mga estudyante sa masunod na nga semana magabalik sa eskuelahan para sa culminating activities sa pagtakop sang school year.
Ini ang isa sa mga ginaabi-abi naton nga break makaligad sang mga tulumanon nga ginhimulatan naton tapuson. Sa diin bala kita maabtan sang Hueves Santo kag Biernes Santo? Sa beach bala? Sa Boracay pa?
Labay man akon, sa Abril 26 pa paserhan ang isla kag posible magalawig sang anum ka bulan.
Ang iban sa aton nagapakamaayo nga magbakasyon o mag-cruise (depende kon makasarang) kay malawig-lawig gawa ang mga holidays.
Wala man kita ginadilian nga magbakasyon karon nga Semana Santa kon ang pagbakasyon o pagtener sa beach o diin man nga baybayon ang palaagyan nga kita lubos nga makapamalandong sang aton pagka-Kristiano. Wala sa lugar o sa panahon ang pagpakabalaan.
Dako man nga hangkat para sa tanan sa aton ang magpabilin nga balaan. Sa kadamo sang tentasyon sa palibot daw sa malugaw-an kita nga matuman ang hangkat nga dala sini.
Masiling gani nga bisan sa conscious nga paghimulat, madamo ang kahigayunan malugaw-an kita sa pag-cleanse sang kaugalingon sa mga tawhanon nga desires.
Una sina ang sa pagkaon. Sa pagsugod sang Kuaresma, ginapadumdum na kita sa pagpangamuyo, pagpuasa kag pag-ulikid sa mga ginakulang. Ugaling sa kadamo sang ponsyon nga aton nakadtuan daw sa indi gid malikawan ang pagpakasasa sa mga buffet o mala-fiesta nga handaan. Mabudlay nga madumduman ang iban nga ginakulang sang pagkaon.
Ang pagka-Kristiano indi lamang sa panahon sang Paskua, Kuaresma o Semana Santa. Adlaw adlaw nga dapat sa pensar kag sa dugah naton. Kita nga nahatagan sang kahigayunan nga magserbisyo, pagakabigon naton ini nga pagpaninguha nga makasakripisyo. Pangalagaran ang mga nagakinahanglan sang serbisyo…kapin pa ang yadtong nagbyahe pa sa mga malayo nga lugar para ma-follow up ang ila mga papeles. Mahapos ang magpamalibad, apang maalagaran ang mga pumuluyo sa gamay nga sakripisyo kag pagpalawig sang pasensya.
Ang bilog nga Semana Santa kasaysayan sang kadalag-an (triumph) nga nagtapos sa isa ka pagsakripisyo bangud sang pangako sang kaluwasan para sa katawhan.
Kita bala nangin false witness sa iban? Kita bala nagtalikod sa isa nga sadto aton ginhangad apang bangud sa pressure kita nagbaliskad?
Nakaagi bala kita hukum sa isa kag wala naghatag kahigayunan nga mapaathag ang iya kasaysayan? Kita bala nangin palaagyan man sa pagdugmok sang iban direkta paagi sa partisipasyon? O naghipus lang?
Mabudlay ang hangkat sa pagpakabalaan. (runjirjamolo@gmail.com/PN)
