PINAL na ang desisyon ni Presidente Rodrigo Duterte nga ipasarado ang isla sang Boracay sa mga lokal kag dumuloong nga torista sugod Abril 26.
Sa sini nga ti-on ginadumilian ang pagbisita sa isla lakip na ang pagpaligo sa baybayon. Ang katuyuan: matinluan ang isla sa higko nga gintuga sang wala plano nga development sang isla – mga developments nga nagpabusog sa tyan sang mga hakugan nga negosyante kag sa mga pabaya nga mga opisyal sang pamunuan lokal kag mga ahensya nasyonal sang pungsod.
Ang anom ka bulan nga closure sang Boracay magaapekto sa 35,000 ka mga tawo nga direct and indirect nga nagapangabuhi sa isla. Nagakahulogan man ini sang halos P20 billion nga kadulaan sa income sa tourism receipts sang pungsod.
Sa pinakaulihi naman nga data may 700,000 ka bookings nga gin cancel sa Boracay nga nagabalor sang halos P30 billion. Pangako naman sang Department of Labor and Employment may nahanda na sila nga programa para sa mga maapektuhan sang pagsarado sang isla nga sang una ginakabig nga paraiso apang subong isa na ka pinatumbyaan nga lugar.
Masakit man batyagon ngaa ang mga makalolooy nga trabahador kag residente ang mas labi nga makabatyag sang kapintas sang desisyon nga pasaraduhan ang isla? Sila ang mga empliyado kag mga ordinaryo lang nga tawo nga nagakabuhi bangud sa madamo nga torista nga nagabisita sa Boracay. Samtang nagalibog ang ulo sang mga makalolooy nga empliyado kag residente sang Boracay kun paano nila atubangon ang bwas nga wala na sang palangabuhian, ang mga hakugan nga negosyante kag patumbaya nga mga opisyal sang gobyerno nagahilayhilay sa kasulhay sang ila pangabuhi.
Ngaa bala nga ang mga makalolooy nga imol ang magaabaga sang kasakun sang mga nag-abuso sa isla?
Sa malawig na nga panahon nagganar sang minilyon na ang mga negosyante sa isla pero ano bala ang ila ginabalik sa isla?
Sa diin naman ginagasto ang P100 nga environmental fee sa tagsa ka torista nga nagasulod sa Boracay? Sa isa lang ka adlaw million na ang kita…ngaa wala man nagatinlo ang isla?
Higko lang ang nakita sa isla…pero sigurado may mas dako pa nga problema nga ara sa likod sang mga higko. Sigurado nga madamo man sang mga tawo nga naulamid kun ngaa nagguba na ang anay paraiso sang pungsod.
Kabay nga mapasabat ang mga may kahimuan sini. Kabay man nga mabuligan ang mga mahalitan nga wala man sang labot sa malain nga dinangatan sang Boracay. (jpranco1975@gmail.com/PN)
