NAGASAGSAG ang iban nga tawo sa paghimo sang sayop kag kalautan kon wala sang may nagasinda sa ila hinimuan.
Nagakabuyo sila sa pagpadayon bangud sa ila paglantaw wala sang sayop sa ila ginahimo kag wala sang may nagasupak sa ila mga bukho.
Nasinda na sadto matapos ang nagtuhaw man nga kontrobersiya sa palibot sang opisina sang Land Transportation Office. Nagtuga man sang kahangawa sa mga pumuluyo nga nagatransaksyon, ginhatagan atensyon kag ginpaaandaman ang mga taghimo.
Apang sa tagsa ka may bag-o nga nagapamuno sa sina nga talatapan, may mga nagapaadbenturar man nga magliwat sa paghimo sang ila mga pagpatalang. Ginatilawan nila kon ang bag-o nga nagadumala may ihibalo sa ila mga aktibidades kag kon may yara sang akto nga pagahimuon batok sa ila.
Mabudlay gid man nga papason kon tudok na sa ila pagsinarayo ang magpanggulang sa ila isig-kapareho ang mga tawo nga nagapangwarta sa palibot sang LTO.
Gindumilian na sadto ang mga tagpatigayon sa mga nagaproseso apang sa karon kaangay sang mga uhong nga liwat nga nagtuluhaw kag nagbalik sa kinaandan nga gawi.
Kaangay sang mga ginahagbasan nga hilamon, sila ang nagatubo sa husto nga tion nga wala sang patugsiling sa nagahimakas nga sila ang mapapas.
Tubtub nga nagapabilin sila sa ila hilikuton, madamo sang pumuluyo ang magabalakhuon, masanag sa tungang-adlaw nga pagpangholdap sa mga wala sang ihibalo, nahinalian, kag wala nakapaminsar sa ginahimo sa ila.
Tubtub nga daw sa wala sang labot ang mga nagadumala sa mga opisina nga ginalibutan sang sini nga mga aktibidades, magapabilin sila sa ila hilikuton, padayon ang ila nga pagpangwarta kag ang pagpanginpulos sa kahuyang sang mga tawo nga nagatransaksyon sa LTO.
Kuntani makalab-ot man sa gobyerno sang syudad, sa natungdan nga ahensya kag sa mga lideres sang natungdan nga barangay ang ini nga sitwasyon. Kuntani nagamurarat man ang ila mata sa kahimtangan nga ginahimo nga pagpamentaha sa nga mga negosyo nga yara sa ila ugsaran.
Samtang may gobyerno kag opisina sang gobyerno nga nagapabulag-bulag sa nagakatabu, ang mga biktima padayon nga magadamo. Samtang bungol sila sa hibubun-ot, ang mga biktima padayon nga magadugok.
Dapat nga magpasad sang hubon ang city government kag LTO nga maga-usisa kon bala ang mga nagatan-ay sang serbisyo nga “medical” ang may yara gid sang doktor kag nagasantu sa standard sang isa ka klinika ang ila lugar. Usisaon may kon may mga business permit kag iban pa nga papeles may kaantanan sa ila ginapatigayon nga serbisyo kag kon husto ang ila ginsukot sa mga tawo.
Kon matuod nga nagakabalaka kag baga-ulikid sila sa kahimtangan sang mga pumuluyo, dapat nga mag-akto ang city govenrment kag ang LTO, upod sa iban pa nga ahensya sang gobyerno.
Dapat nila nga usisaon, hibaluon, tukibon kon ano ang nagakatabu kag indi lang maghulat sa magahod nga reklamo ukon sa magansal nga pagpahayag sang sentimento.
Ginalauman naton nga magamato-mato ang LTO sa pagsilhig sa mga sagbot nga yara sa ila palibot, sa paghawan sa mahimo masandaran sa ila ugsaran kag kuntani makamuklat sila kag magaakto nga indi na pagtolerahon. (bertladera@gmail.com/PN)
