SANG sini ko lang nadumduman ang reklamo sang isa ka senior citizen sadtong Domingo, Abril 29, nga ka-istorya ko sa tabuk sang dalan nga naga-atubang sa Mandurriao Public Market.
Gahulat ako sadto kay asawahon nga nagapamalaklon sa sulod sang merkado pagkatapos sang a las sais nga misa sa simbahan sang Mandurriao.
Wala ako nag-upod kay Mrs. Pasulod sa merkado kay daw galingog-ngog ang ulo ko kag basi maglingin na gid ini sa kadamo sang mga bumalakal diri.
Wala lang ako ugaling namangkot sa ka-istorya ko nga senior citizen. Siya na mismo ang nagmuno sang iya reklamo sa akon.
Ang ginareklamo niya amo ang pagginutok sang mga salakyan sa dalan nga naga-agi sa atubangan sang merkado, nga gin-ugyonan ko man.
Makitid na nga daan ang dalan apang dinugangan pa ini sang pagginutok sang mga salakyan diri, siling gani namon.
Nanotaran namon nga ang mayor nga problema amo ang madamo nga mga salakyan nga nagapulondo sa kilid sang plaza sa atubangan sang merkado.
Ang rason amo ang madamo nga mga naga-parking kag naga-waiting nga mga salakyan sa kilid sang plaza. Ambot kon ginatugutan ang pag-parking kag waiting diri sa kilid sang plaza.
Ang siste kay may ara pa dira nga naga-double parking nga dyep kag mga traysikol nga nagahulat sing pasahero halin sa merkado.
May isa gani ka trak, nga ang karga sa sulod wala kita sing ideya, nga naga-triple parking pa. Basi naga-waiting. Ayhan sa gina angan-angan nga pag-ariya sang kargamento sa merkado. Pero, Diyos ko mio! Yara na ini halos sa tunga na sang dalan.
May bwisit pa gani nga traysikol nga naga-parking sa atubangan sang waiting shed nga apiip gid sa pulungkuan dira sa diin ang may luyag magpungko indi na makapungko.
Sang pamangkuton kon sin-o ang tag-iya sang traysikol, ang sabat sang isa ka daw may ginahulat man didto sa tabuk sang dalan, siling niya: “Ambot… basi may ginahulat.”
Samtang wala sing bisan sin-o man nga pulis, nga yara sa Mandurriao Police Station sa ila atubangan, ang naga-sita sa ila. Sa pagtan-aw naton wala man lang gani sing pulis ang bisan nagatulutan-aw lang sa gwa sang police station.
Ang mga pulis bala sa police station wala sing obligasyon sa pag-sita sining naga-ulupas lang nga mga salakyan sa kilid sang plaza?
Katulad lang bala sila sa sikyu (security guard) sang pribado nga kompaniya nga indi puede magbiya sa iya pwesto bisan may kinagamo nga puede matambagan niya dira sa unhan, kag puede lang siya magtawag sing igtalupangod sang pulis ukon barangay tanod dira, tutal may natungdan man dira nga traffic aide?
Butang ta pa nga matuod, pero indi bala obligasyon man sang pulis ang magsaway ukon magdakop na gani sang mga nagalabag sa kasuguan,kag ang ining pagginutok sang mga salakyan sa kilid sang plaza isa ka violation sang aton kasuguan sa trapiko kag public order?
In other words, ang pulis indi katulad sang sikyu sang pribado nga kompaniya nga magapamusi-musi lang sang iya mata kag gapamiyuko sa sulod sang police station. Dapat mag-entra man ang pulis kay ga-involver man ini sang violation sang kasuguan, indi bala, tsip?
Nga daan wala man ako sing nakita nga traffic aide nga malapit dira nayon sa dalan sa atubangan sang merkado.
Sang may ginpamangkot kita parti sa traffic aide, may nagtudlo didto nayon sa likuan sang isa ka bahin sang merkado nga nagapamiyu-miyo lang sa higad sa parkingan sang mga traysikol.
Sa nakita ta, wala man sing problema didto kay basta ga-linya man sing husto ang mga traysikol paggwa kag pasulod sa parking area. Ti, ngaa indi abe siya magsaylo diri nayon sa atubangan sang plaza kag magsaway sa sining salawayon nga mga salakyan?
Ti, ano ang masiling mo parti sini, Sir sang traffic kag public safety diri sa siyudad?
Wala ka gid galaaw-law man lang dira sang imo mga tinawo? Lawlaw ka kon amo sina, indi bala? (w_mateojr@yahoo.com/PN)
