GINAHULAT na lang ang pila ka oras antes mahusgaran kon sin-o ang mapilian sa mga kandidato nga nagpadalagan sa Barangay kag Sangguniang Kabataan Elections.
Makul-aw ang presensya sang mga poster kag tarpaulin sa palibot kag ginsalig na lamang sa social media, ilabi na sa Facebook, ang ila pagkampanya. Kadamuan ang mapisan man sa pagpadulong sa tagsa nila ka mga pumuluyo agud nga ikampanya ang ila kaugalingon.
Matuod, halos nagalikaw ang iban nga kandidato sa paggasto sang lubos sa mga campaign materials kag gintipigan ang kwarta nga indi makagwa sa tion pa lang sang kampanya.
Apang may mga pasuni nga sikreto nga ginapadanlugan sang mga pulitiko ang kandidatura kag pagkampanya sang ila mga kandidato sa tagsa ka barangay. Sila ang nagapangita sang paagi kon paano makatipon sang daku nga kantidad agud nga magamit sa paghaylo sa mga botante nga botohon ang ila manok sa eleksyon.
Katuyuan sini nga masiguro nga ila kandidato ang magadaug kag agud nga may yara sila sang makinaryas, organisasyon kag tawo sa palaabuton pa gid nga midterm elections sa tuig 2019.
Sa subong pa lang nagatanum na sila sang ila masandigan para sa ila nga kandidatura. Ginasiguro nila nga indi sila malugaw-an, nga indi sila mahul-an kag agud nga indi sila madulaan sang poder kag gahum sa ila banwa.
Kaangay sang isa ka negosyo, ginakapitalan nila ang kandidatura sang ila tinawo sa barangay agud nga sa tion nga magdaug kag sila naman ang magpapili, may yara na sila sang kwaan nga ginansya sa ila ginkapitalan.
Indi matuod nga wala sang pulitiko sa likod sang piniliay sa barangay. Makabig nga hangag kag patumbaya ang pulitiko kon wala siya sang may ginahimo, sikreto man ukon hayag, sa sini nga piniliay sa barangay.
Nagareklamo man sa iya Facebook account si Councilor Plaridel Nava nga ginagastuhan todo ni Cong. Jerry Treñas ang iya kandidato sa ila barangay agud nga mapukan ang ila kauglingon nga kandidato.
May pasuni man sa probinsya sang Guimaras nga ang tagsa ka Sangguniang Bayan Member ang ginakutahan nga maghatag sang 10 mil pesos nga amot sa tagsa ka barangay kag tupungan sang isa ka daku nga pulitiko agud nga gastuhon sang ila kandidato agud nga sila ang mangibabaw sa eleksyon.
Ginapahulag sang mga pulitiko ang ila nga tinawo kag ginapadulungan ang mga indi magpabor sa ila kandidato agud nga mahaylo kag maglubag sa ila panindugan kag suportahan ang ila ginduso.
Nagasugilanon ang kwarta sa mga tawo, bisan ang mga bungol ang makabati na, bisan ang mga nagatalikod ang nagabalikid na, bangud ina sa maayo mag-istorya nga kwarta.
Kabay pa nga indi matuod ang sugid sang pila ka kandidato sa barangay nga ginagamitan sila sang kwarta kag poder sang ila kasumpong nga nagasandig sa pader sang gahum.
Indi na kita matingala kon nagakatabu ini sa probinsya sang Guimaras, ukon sa bisan diin man nga lugar bangud nga ang mga pulitiko nagapaniguro man sang ila kadalag-an para sa 2019 nga eleksyon.
Madamo sa ila ang magadaug nga gin-abonohan ang kadalag-an. (bertladera@gmail.com/PN)
