NATINGALA gid ang isa ta ka abyan kon ngaa sa halos kada Domingo niya nga pagsimba wala gid siya sing nakita nga pulis ukon soldado nga nagasimba.
Nanotaran ko man ini sa Mandurriao Church sa diin nagasimba kami nga mag-asawa kada Domingo.
Ugaling, kon wala ini ginmuno sang abyan ko, daw wala man gani sa akon buot. Apang kay ginmuno na niya ini nagtomar na ako sang interes.
Tuod no? Wala gid matuod kami nakakita ni asawahon sang bisan isa ka pulis nga nagasimba diri samtang pila lang ka dupa ang antad sang Mandurriao Police Station sa simbahan.
Mga erehes bala ang aton mga pulis sa Mandurriao? Indi ayhan sila katoliko kag lain ang ila simbahan?
Malayo seguro. Halos 80 porsyento sang mga Filipino mga katoliko. Indi ako magpati nga wala sing katoliko sa bisan isa lang sa mga pulis diri sa Mandurriao.
Sa subong, diri na kami sa Mandurriao Church nagasimba kon Domingo sa a las sais sa aga nga misa. Kag wala matuod kami nakakita sang bisan isa lang ka pulis ukon soldado nga nagasimba diri.
Sadto sang nagasimba pa kami sa Jaro Cathedral kon Domingo, wala man kami nakakita sa ila nga nagasimba diri. Nakaagi man kami sa pagsimba sa San Jose Parochial Church lapit sa Plaza Libertad, apang wala man kami nakakita bisan landong nila diri.
Indi ayhan sa lain sila nga inoras ga-simba? Ukon wala gid ini sila nagasimba. Kag kon gasimba man, dira lang seguro sa Camp Delgado sang mga pulis kag kon diin nga kampo sang mga soldado.
Ambot lang. Nahibal-an man naton ugaling nga may katapo sang kapulisan kag mga soldado nga halin sa mga relihiyoso – katulad sang pari, pastor, imam, kag iban pa.
Non-combatant, ukon indi hangaway, ini sila nga naga-atipan sa kinahanglanon ispiritual sang mga pulis kag mga soldado.
Lakip sang ila obligasyon amo ang paghiwat sang kasal, pag-bendisyon sa mga namatay, kag mga misyon medical. Kag syempre sa paghiwat sang misa para sa mga katoliko kag sang kasubong nga seremonya sang iban nga pagtuo. Wala ini sila nagadala sing armas, pakilala nga indi sila hangaway.
Segurado naton nga ining mga relihiyoso gatudlo gid sa mga pulis kag mga soldado sang pagka-importante sang pagsimba kag pagpadumdum sa ila sang ila obligasyon ispiritwal paagi sa sermon sang pari, kag sa kasubong nga kahiwatan sang iban nga pagtuo.
Matuod, ang Diyos kaupod naton sa tanan nga kahigayunan, kag makapakig-angot kita sa Iya sa bisan ano nga oras.
Apang lain gid ang makatambong kita sa misa bisan sa Domingo lang, partikular sa mga katoliko, kay sa bisan sa sermon lang sang pari mapadumdum kita sang mga pulong sang Diyos.
Sa siling gani sa Mic 4:2, “Come, let us go up to the mountain of the Lord to the house of the God of Jacob. He will teach us His ways, so that we may walk in His paths.”
In fact, importante man nga ang mga pulis kag mga soldado naton makapalapit sa Ginuo bisan sa pagtambong lang sa misa agud indi sila lubos mapalayo sa Diyos kag sa Simbahan, labi na gid kay sa aton sosyedad mga soldado ini sila sang Estado kag indi sang Simbahan.
Ang aton Konstitusyon nagaathag sang indi pag-isa sang Estado kag Simbahan. Tungod sini, mga soldado lang sila sang Estado kag indi sang Simbahan sa idalom sang ginamando nga “Separation of Church and State”.
Dapat lang ugaling nga bisan sa ila lang balatyagon “soldado” man sila gihapon sang Ginuo kag sang Simbahan agud indi madula sa ila ang pagtaha sa ila pagtuo kag sang mga naga-representar sini.
Indi maayo sa aton pagtuo nga pasapayan lang ang pag-tratar naton sa aton mga pari kag iban pa nga relihiyoso. Gasayop man sila, matuod, pero may paagi sang pagreklamo nga indi man dapat, katulad sang pagpasipala kag pagtamay sa ila nga indi nagakaigu.
Tani, bisan sa balatyagon lang “soldado” kita gihapon sang mga nagaulikid sa aton ispiritwal nga kabuhi, kag indi katulad sang mga soldado Romano nga nagayamuhat sa Ginuo, nag-torture sa iya, kag naga-selebrar pa sang iya kamatayon. (w_mateojr@yahoo.com/PN)
