NANGIN mainit ang nakaligad nga piniliay sa Sangguniang Kabataan (SK) Pederasyon.
Kuntani kalipatan na natun ini pero indi gid madula ang kadamak sang estilo sang mga gurang nga politiko.
Nagalibog lang ang akun ulo kun paano natipon ni Leila Luntao, ang nagdaug nga SK Pederasyon president, ang mga kaangay nga SK chairpersons sa bug-os nga syudad?
Gin-ako mismo ni Luntao nga tatlo ka adlaw ang election, gintipon niya kada distrito ang mga kaangay nya nga SK chairpersons. Pag-ako ni Luntao, wala sya nagpamalaybalay kundi per district.
Anay ka, indi bala nga indi pwede makapangampanya ang mga magakandidato sa SK Pederasyon? Ti ngaa nangampanya si Luntao?
Indi ayhan ini pwede mangin grounds sang iya disqualification?
Abi sa mga mangin-alamon sa kasuguan angut sa election base pwede mangin test case ini?
***
Samtang ano naman ka matuod nga bangud wala malambot ang ginpangako nga 145 ka boto para kay Luntao, dismayado si Mr. Politiko nga patron sang bataon nga politico?
Ano ka matuod nga ginapabawi karon ni Mr. Politiko ang P5,000 nga iya ginhatag sa 52 ka SK chairpersons nga wala nagboto kay Luntaw? Ini bangud nga 93 lang ang nagboto diri.
Ini ang kabangdanan nga bisan nagdaug man si Luntao, nagaalburoto si Mr. Politiko.
Ginakulbaan kuno ang SK chairpersons ilabi na ang taga -City Proper District kay ginabawi kuno ang ginhatag sa ila nga P5,000.
***
Ngaa bala grabe gid ang opensiba ni Cong. Jerry Treñas kay Mayor Jose Espinosa III?
Bisan wala man si mayor nagakumento kontra sa iya, ngaa masakit ang mga tinaga nga ginabuy-an ni Treñas?
Ngaa bala daw ginakulbaan si Treñas sa mga hulag ni Joe? Indi bala nga iya man halos ang tanan nga mga kapitan sa syudad? Ti ngaa daw ginasindihan ang iya alatrasan?
Pamatuod lang bala ini nga indi kampante sang iya kadalag-an si Treñas sa 2019 elections? Ngaa daw ginakulbaan gid sya pirme?
Kun nagapainit si Treñas, cool lang si Espinosa. Kun stressed si Treñas, kampante naman si Joe III.
Pamatudo lang ini nga sa ila nga duha, mas daw mapatay si Treñas nga maangkon ang liderato sang syudad.
****
Kabay pa nga sa pagpuas sang aso sang mainit nga kalayo sang pulitika, mangibabaw sa gihapon ang dugo kanday Treñas kag Espinosa! (jpranco1975@gmail.com/PN)
