MAY una nga higayon ang tanan nga bagay, bisan pa ang ginakabig nga tuigan na nga hitabu ukon kinaandan na nga hiliukuton. Nagasamo ang balatygon sang isa ka tawo sa tagsa ka tion, sa tagsa ka higayon kag sa tagsa ka yara siya sa bag-o nga sitwasyon. May kahangawa, may kakulba, may kalipay, may pag-alang alang kag may nagapigar nga indi maglutaw sa iya hulag ang tensyon nga nagalabugay sa iya nga dughan.
Kinaandan ini nga makita naton sa mga estudyante sa una nga adlaw sang pagbukas sang klase. Mahangpan naton ini bangud nangin estudyante man kita. May mga bata nga ginadapit sang ginikanan, ukon mismo sang ila lolo ukon lola, kag may yara man sang ginapilit agud nga sa klase magasulod.
Ginapatudok naton sa ila ang kaimportante sang edukasyon. Para sa aton ini ang mangin lyabe sang masanag nga palaabuton. Kon may edukasyon, may yara sang maayo nga trabaho, indi mabudlayan sa pagpangabuhi, kag indi matonto sang isig-kapareho.
Ini ang aton naandan nga rason kon ngaa kinahanglan ang edukasyon. Sadto pa man, gindesinyo na ang aton edukasyon nga mangin palaagyan sa pagtuga sang isa ka empleyado, maalam, masaligan, kag may ikasangkol sa pagtuman sa mga tulumanon sa gintugyan sa iya nga trabaho.
Sa paglipas sang panahon, may mga ginduso nga pagbag-o kag mga padugi agud mas mangin mapuslanon kag makatrabaho gilayon ang isa ka gradwado nga estudyante. Luyag sang gobyerno nga makaangkon sang trabaho ang tagsa ka tawo kag ang bag-o nakatapos ang dapat may yara sang sudlan nga obra agud nga makabulig sa iya nga pamilya.
Sa sini nga paglantaw, nagapatubas kita sang mga obrero, mga trabahador nga nagasandig sa ginatan-ay nga obra sang mga negosyante kag dalagku nga korporasyon.
Indi naton mabasol ang gobyerno bangud ginapakamalaut ini kon madamo ang wala sang obra kag nagahuyang ang ekonomiya.
Indi man naton mabasol ang tagsa ka pamilya nga magsunod sa sini nga sistema sa handom nga makatibawas sa ila pangabuhi kag makaangkon sang kasulhay sa ila matag-adlaw nga paghimakas.
Kuntani aton man ipahangop nga wala sang may nagamanggaranon ukon nagaagom sang mas ligwa nga pangabuhi kon nagapabilin lamang nga mamumugon, kon nagapabilin nga higot sa walo ka oras nga trabaho sa iya nga ulubrahan.
Sa masami, ginapahanumdom gid nga importante ang magtuon sa kon paano magnegosyo bangud mas maayo ang palaabuton kon magnegosyo kaysa sa mag-agwanta sa pagtrabaho sa mga kompaniya.
Kahibalo kita nga ang sistema sang aton edukasyon gin-ilog sa sistema sang Amerika kag ang ila tuyo sadto nga himuon kita nga mapuslanon para sa ila kaugalingon nga interes kag agud magamit nila sa ila mga plano.
Yari na kita sa sitwasyon, yara na sa aton ang pagpangita sang paagi kon paano naton lantawon ang banas nga paga-usuyon. Mas nakahibalo ang ginikanan kon ano ang kabudlay sang ila paghimakas kag dapat nila giyahan ang ila kabataan sa banas nga mas nagatan-ay sang maayo nga bwas-damlag.
Madamo na sang ginatan-ay nga libre ang gobyerno agud nga mahatagan sang edukasyon ang kabataan kag ini para sa ila masanag nga palaabuton./PN
