NANGIN kinaandan na nga gawi sang mga kontraktor sa syudad sang Iloilo ang mangin laminday ukon uyaya sa paghuman sang ila mga proyekto.
Madamo na sila sang napaminsaran nga rason nga mahimo nila ibungat kon sila ang kuwestyunon sa naga-igod nga progreso sang ila konstruksyon.
Posible nga kampante sila bangud yara ang Department of Public Works and Highways nga magapaathag sa publiko kon ngaa atrasado ang paghuman sang proyekto.
Kaangay sa sitwasyon sa dalan Luna sa distrito sang La Paz, may yara sang gin-obra nga kanal, wala nga bahin kon ikaw magatabok sa Forbes Bridge, nga madugay man mahuman kag lagpas sa gintalana sa ila kalendaryo kag ang pinakapunta sini malapit sa isa ka hotel ang wala pa mahuman tubtub sa karon, wala sang tabon kag wala na ang kontraktor.
Kuntani ginlantaw man sang Iloilo City District Engineering Office (ICDEO) sa idalom sang pagdumala ni Engr. Rodney Gustilo kon nakumpleto sang kontraktor ang ila trabaho antes nila bayaan.
Hulaton pa bala naton nga may yara sang mahulog sa kanal antes tabunan? Wala bala ini makita sang ICDEO? Masobra na isa ka bulan ang buho nga daku nga nagatangla sa langit kag nagahulat sang kaluoy nga mabutangan sang tabon agud wala sang tawo nga magbaruron sa idalom.
Nagsugod man ang pagbungkal sa dalan kag ang laminday nga pagbubo sang semento. Nagkipot ang alagyan bangud sa isa na lang ang malabayan. Madamo ang nagaagwanta sa huol nga ginatuga sang madugay mahuman nga karsada.
Nagbukas na ang klase, nagsugod na ang tingulan, apang karon lang nagbakas ang mga kontraktor nga padasigon ang ila trabaho bangud man nga madamo na sang nagareklamo.
Una nga nagreklamo ang daku nga establisemento komersyal bangud nga nangin maninit ang sulod sang tawo kag apektado ang ila nga benta. Wala sang salakyan nga makasulod sa ila bangud sa ginakay-o nga karsada.
Nagdungan man ang pagkay-o sang mga kanal, linya sang tubo sang MIWD kag ang pagpahamtang sang tamburong nga mangin alagyan sang tubig.
Mas pa gid nga naghinay ang progreso sang konstruksyon kag mismo ang sektor sang transportasyon ang nagapamulpog na sa ICDEO nga padasigon ang trabaho.
Matapos mabatian ang mga magahod nga makinaryas nga nagabulos-bulos sa ila pagdominar sa dalan, nabatian man ang tingog ni Engr. Rodney Gustilo.
Nangin tagpaathag si Gustilo sa kalaminday sang mga kontraktor. Kahibalo si Gustilo kon ngaa madugay mahuman ang proyekto, kon ngaa atrasado ang paghulag sang nga tinawo.
Mismo si Gustilo ang nangin tagpamaba. Ginplastar niya nga kulang sa heavy equipment ang kontraktor. Posible nagahulam lang sa iban ukon nagahulat kon san-o magbakante ang gamit antes nila magamit sa ila proyekto.
Maalam si Gustilo maghatag sang rason, nga kon imo lantawon daw rason nga nagatabon, agud nga indi magsunggod ang kontraktor.
Kuntani untatan na ang sistema nga ihatag ang proyekto sa kontraktor nga wala sang gamit. Kuntani ipahibalo sa publiko nga ang kontraktor ginapenahan paagi sa pagbayad sang multa sa mga inadlaw nga naatrasar sila sa pagpatuman sang proyekto.
Kuntani tingog nga nagadisiplina sa mga uyaya nga kontraktor ang aton mabatian kay Engr. Gustilo kag indi tingog sang tagpamaba. (bertladera@gmail.com)/PN
