NALIPAY gid ako sa balita ni abyan Ting Palmares, isa ka executive sa Office of the Mayor sang Passi City, parti kay Maninay (sa kasal) Ruth Tirol-Jarantilla, nga madugay ko na wala makita ukon makigbalita man lang.
Siling ni Ting, si Maninay Ruth isa sang mga pioneer nga nagtukod sang vacation resorts sa Boracay. Amo man gani ang balita ko, kag luyag ko man tani makaduaw didto sa iya resort. Apang wala gid. Budget ang problema, a.
Salamat, sunu kay Ting, kay si Maninay Ruth nga abyan man niya indi kalakip sa mga resort nga may mga violation.
Masakit lang ugaling kay nadalahig man siya sa violation sang iban nga resort owner. Sa sala sang isa ukon pila lang, ining sala ginpasalo sa tanan sang gobyerno nasyonal sang ginpasara ang bug-os gid nga Boracay.
Bawi lang ugaling sa pagbukas liwat sang Boracay, a. Kag regards lang sa inyo ni maninoy kag sa bug-os nga pamilya.
***
Nag-proponer si Konsehal Lyndon Acap sadtong nagligad nga sesyon sang Konseho nga ibalik sa “city roads” ang mga ”national roads” nga ginpa-pasaran hagna ni Kongresista Jerry P. Treñas sa Kongreso nga nangin kasuguan na.
Tungod sang daku nga kaayuhan nga igadulot sa siyudad sining hagna ni Treñas gin-updan gani ini sing lubos sang Konseho sa isa ka resolusyon. For one, wala gasto ang siyudad sa pagpa-ubra sining mga dalanon.
Wala makaboto ugaling si Acap sa sining resolusyon tungod napierde ini sa 2016 nga eleksyon kag nakabalik lang sang sini lang tungod sang pagsaka sa pwesto ni anay Vice Mayor Joe III Espinosa sa pagka-mayor kag ni No. 1 Councilor Jeffrey Ganzon sa pagka-Vice Mayor.
Apang ngaa luyag ni Acap ibalik sa “city roads” ining pila ka dalanon nga “national roads” na? In fact, ginpakalain pa ini ni Acap.
Ina tungod gapati siya nga indi na makabyahe ang mga for-hire nga mga tricyle kag trisikad (pedicab) sa sining mga “national roads”.
Indi ayhan nagsayop lang si Acap sa iya paghangop sang kasuguan parti sini?
Sunu sa DILG Memorandum Circular No. 2007-01 nga suportado naman sang Department of Transportation and Communication (DOTC), ang for-hire nga tricycle kag trisikad puede makabyahe sa pila ka “national roads” kon indi man lang sila makasabad kag makadulot sing disgrasya diri.
Siling gani sang MC No. 2007-01, sa iningles: “For safety reasons, no tricycle or pedicab should operate on national highways utilized by 4-wheel vehicles greater than 4 tons (lakip ang jeepney) and where normal speed exceeds 40 kilometers per hour.”
In other words, sa akon personal nga paghangop sini, puede ang Konseho makapasar sang ordinansa nga naga-regulate sang pagbiyahe sang tricycle kag trisikad sa mga “national roads” for as long nga indi sila mag-kumpetensya sa madasig nga mga salakyan nga nagadalagan sing sobra sa 40 kph.
Sa nahibal-an man naton, ang lokal nga gobyerno may poder sa idalom sang Local Government Code sa paghatag sing frankisa sa ila.
Sa siyudad karon may ordinansa nga kon tawgon Speed Limit Ordinance, nga naga-regulate sang kadasigon sang pagbiyahe sang mga salakyan sa mga masako nga dalanon, katulad sang Diversion Road kag iban nga mayor nga dalanon sang siyudad.
Kalaban sa sining nahingadlan nga mga dalanon ang speed limit indi maglapaw sa 40 kph.
Siyempre ang wala mahingadlan amo ang mga dalanon nga wala sing problema sa kadasigon nga pagpadalagan. Kon may problema dira, tani nadala man sila sa mga dalanon nga ginbutangan speed limit, indi bala?
Sa mga dalanon nga nahingadlan sa Speed Limit Ordinance, wala dira bisan isa sang mga dalanon nga ginpa-converter ni Trenas halin sa “city roads” pakadto sa “national roads”.
In other words, ining mga “national roads” wala sing problema sa kadasigon nga sobra sa 40 kph sa diin ginapa-ban sang DILG MC No. 2007-01 ang pagbiyahe sang for-hire nga tricycles kag pedicabs.
Wala kita nagasiling nga sayop si Acap sa iya paghangop angot sa sining “national roads”.
Ang masiling ko lang nga daw husto man ako seguro sa akon paghangop sang DILG MC No. 2007-01 nga dapat wala sing problema ining mga “national roads” para sa mga for-hire nga tricycle kag trisikad. (w_mateojr@yahoo.com/PN)
