NAGAKADAPAT bala nga magmang-agaw sang mga bagay nga wala mo ginapanag-iyahan? Angay bala nga mag-angkon sang mga butang nga wala ginpangabudlayan?
Nahangpan naton ang kahimtangan sang mga pigado bangud kita mga pigado man nga nagahimakas nga makatibawas kag makataklad sa matad-adlaw nga pagpanghangkat sang kabuhi.
Madamo sang pamilya ukon indibidwal nga wala sang kaugalingon nga balay, ang iban sa ila nagalumon sa ila mga himata, may yara sang nagapang-arkila kag nagabayad sa tagsa ka bulan.
Nakita man naton nga nagapangita sang paagi ang gobyerno kon paano mahatagan sang balay sa barato nga presyo ang mga empleyado sang gobyerno kag mga suldado ukon pulis nga makaangkon sang kaugalingon nga balay kag makapasad sang ila pamilya nga may yara sang mapasilungan.
Nakibot na lamang kita sa natabu sadto sa Bulacan sang magsulong ang mga katapo sang Kalipunan ng Damayang Mahihirap ukon KADAMAY kag ila ginpang-okupar ang mga bakante nga balay.
Gintugutan sila kag ginhangop ni Presidente Rodrigo Duterte nga okupahon bangud nga bakante kag nagpasalig sa mga suldado kag pulis nga hatagan sila sang tuhay nga lugar kag bag-o nga balay nga para sa ila.
Makalipas ang pila ka bulan liwat naman sila nga nagtinguha nga magsulong kag mag-okupar sa mga balay sa Rodriguez, Rizal nga daw kaangay lang nga sila ang mga benepisyaryo.
Makita naton nga wala na sila sang patugsiling, ginpatalang, gindabukan ang ila paminsaron kag balatyagon agud nga magtuga sang akto nga supak sa kasuguan. Ang ila akto amo ang pagpang-agaw sa balay nga indi para sa ila.
Madamo sang naakig, madamo sang natingala kag madamo sang nagayaguta sa grupo sang KADAMAY.
Aton balikan kon paano sila napasad kag kon ano ang ila katuyuan.
Gintukod ang Kalipunan ng Damayang Mahihirap ukon KADAMAY sadtong Nobyembre 7, 1998 sa Quezon City paagi sa paglunsar sang pungsodnon nga komprehensya sang mga organisasyon sang mga pigado sa syudad.
Isa ini ka pungsodnon nga demokratiko nga organisasyon sang masa kag alyansa sang mga kaupdanan, asosasyon, kag iban pa nga sahi sang organisasyon sang mga pigado sag syudad.
Nagatindog ang KADAMAY bilang militante nga sentro sang mga pigado sa syudad kag nagapanguna sa paghimakas sang sektor agud nga maagom ang nga nagapanguna nga interes kag ikaayo sang sektor.
Katuyuan nila nga pukawon, organisahon, bukludon, kag pahulagon ang paghiliusa sang mga pigado sa syudad sa bug-os nga pungsod kag mangin makusog nga pwersa sa paghulag para sa pungsodnon nga demokrasya kag kahilwayan.
Pamunuan ang mga paghulag sang mga pigado sa syudad agud isudo ang mga gilayon kag importante nga hingyo para sa trabaho, palangabuhian, sweldo kag kita. Igaduso man sini ang mga hingyo agud ipamilit ang mga angay nga sebisyo sa komunidad kag nagapanguna diri ang disente nga ilistaran, edukasyon, ikaayong-lawas kag agud awayon ang magkatuhay nga dagway sang pagpamigos sa mga kinamatarong.
Sa sini nga mga katuyuan sa pagpasad sa KADAMAY, wala nasaad diri ang magpang-agaw sang balay, magpang-okupar sa nagatindog nga balay para sa iban nga benepisyasyo.
Kon nagpangsubli sila sang balay, wala ayhan nagalisa sa ila katuyuan ang KADAMAY? (bertladera@gmail.com/PN)
