BALIK eskuela na ang kadam-an sang mga bumulutho nga liwat magapangatubang sa hangkat sang pagtuon karon nga nagsugod na ang school year 2018 – 2019.
Ginabanta nga duha ka milyon ka bumulutho sa kindergarten, elementary kag high school sa pangpubliko kag pribado nga eskuelahan ang magahimakas nga makalampuwas sa ila mga natungdan nga halintang.
Nahibaluan naton nga ang pagpaenrol sa eskuelahan wala nagakahulugan sang segurado nga pagtapos sang isa ka tuig nga pag-eskuela. Bisan sa sina’ng kamatuoran padayon ang aton pagpaninguha – ang mga ginhikanan nagabatas sang bili sang edukasyon mapaalam lang ang ila natungdan nga kabataan.
Tagsa ka tuig, ang gobierno nagapangatubang sang hangkat sa pagpalab-ot sang kalidad nga edukasyon para sa tanan bangud ang edukasyon duna nga kinamatarung sang banwahanon.
Ginahimulatan lubad ang problema sa kakulang sang mga hulot klasehan (classrooms) subong man sang mga manunudlo (teachers) sa public schools bangud sang nagataas nga student population.
Suno sa rehiyunal nga talatapan sang Department of Education, may 65,598 ka manunudlo sa public schools nga suportado sang 7,116 ka non-teaching staff agud magabayan sang husto ang mga estudyante sa ila pagtuon. Suno kay Dr. Victor De Gracia, assistant regional director sang DepEd sa Kabisay-an Nakatungdan, bastante ang mga manunudlo sa pagtudlo sa 4,572 ka public schools (3,402 sa elementary, 677 sa Junior High Schools kag 493 ka Senior High Schools).
Ginasiling sang rehiyunal nga talatapan sang DepEd nga yara sa 40 ang class size sa mga eskuelahan sa bilog nga rehiyon nga may 57,713 ka classrooms – 37,922 sa elementary, 15,560 sa secondary kag 4,231 sa senior high schools sa anum ka probinsya kag napulo’g anum (16) ka syudad. Magluwas ugaling sa mga urban center kasubong sang syudad sang Iloilo kag sang syudad sang Bacolod nga taglumapaw ang kadamuon sang mga estudyante sa numero sang classrooms. Bangud sini, mapilitan ang mga school principal ukon school administrators sa pagpatigayon sang morning kag afternoon shifts agud ma-accommodate ang tanan nga estudyante.
Kanya-kanya na ang mga estudyante sa ila mga diskarte sa pagsangkoy sang bilog nga school year sa tunga sang mga pamahug sang barkada, computer games, illegal drugs kag iban pa nga posible makapatalang sa aton mga estudyante sa purpose sang pagpadala sa ila sa eskuelahan.
Ang pagpaalam sa aton mga estudyante nasandig sa aton buluylog nga pagbantay kag paggabay. Ululupod kita nga maggabay sa aton mga estudyante. (runjirjamolo@gmail.com/PN)
