MABUDLAY nga kaaway ang gobyerno. Amo ina ang kamatuoran. Kun mahapos lang nga pukanon ang gobyerno kuntani nagmadinalag-on na ang Communist Party of the Philippines – New People’s Army (CPP-NPA) sa pagpukan sang ara sa gahum.
Kun gobyerno ang imo kasumpong, sigurado nga may matup-an ka gid nga imo nagakaangay nga pahamtangan. Sa isa lang ka pagkumpas sang presidente, sigurado todas ka.
Halimbawa diri ang natabu kay Punong Barangay Remia Gregori nga ginpatay sang armado nga mga kalalakihan sa Crystal Beach Resort sa Barangay Igcadlum, San Joaquin, Iloilo. Sin-o maglaum nga mapatay si Gregori sa sulod mismo sang iya propedad? Sin-o ang maglaum nga didto sya sundon kag todason sang nagahandum sa iya kabuhi?
Indi pa maathag kun sin-o ang may kahimuan sini. Apang sa paandam ni President Duterte sang sya ang nagbisita sa Philippine Councilors League (PCL) national convention diri sang nagligad nga bulan, sigurado makapaminsar ka sang kun anu-ano lang.
Ang kamatayun ni Gregori pagtuman ayhan sang mando ni Duterte nga tipokon ang mga ara sa ilegal nga droga? Imbes nga iregalo sa pag-abot diri sang Presidente, ginhatag na lang bilang post-celebration matapos nakabiya na sa Iloilo ang Presidente?
Maswerte lang si outgoing Punong Barangay Noel “Nene” Odicta sang Barangay Tanza-Esperanza, City Proper. Arestado lang sya kag wala ginpatay. Bisan nagaalegar pa sila nga gintamnan sang ebidensya, maswerte sya kag may hangin pa nga nagagwa sa iya baba. Masubo lang kay may napatay nga isa niya ka kaupod.
Sin-o ayhan ang masunod? Siling nila si Kap Keith “Dabing” Espinosa sang Barangay Monica-Blumentritt naman ayhan ang masunod? May rason ayhan sya nga makulbaan?
Paano naman si anay Punong Barangay Noemi Hablo sang Desamparados, Jaro? Dapat man sya bala makulbaan? Kumusta naman si Kap Gemma Calzado sang Barangay Kasing-kasing, Molo?
Indi mapaktan kun ano ang masunod nga matabu. Mabudlay man basahon ang hulag sang gobyerno.
Ang sabat lang diri amo nga maghimo kita sang angay kag nagakadapat. Indi maglapas sa kasuguan. Droga dapat gid nga likawan.
Tandaan kun gobyerno ang kontra mo, wala ka gid sang padaug. Wala ka sang lusot. Sa madugay kag sa madali, kuhaon ka sang kamot sang gobyerno. (jpranco1975@gmail.com/PN)
