GAPASALAMAT kita, upod sa madamo pa, nga si Presidente Duterte nag-sorry sa Diyos – nga gintawag niya nga “stupid” – sang mga Kristiyano lakip na ang mga Muslim nga nagayaub sa Diyos nanday Adan kag ni Eba kag ni Abraham nga Amay sang Katauhan.
May kapatawaran ang Diyos, Mr. President.
***
Madamo sang mga nagahangad kay anay konsehal Dave Jamora ang nakibot sa balita nga may handom pa siya sa pagbalik sa konseho sang siyudad sang Iloilo pagkatapos sang madamo nga tinuig.
Anom ka tuig ini siya nga nadula sa eksena sang pulitika sang ma-ospital siya sa sobra niya nga kapisan sa pag-serbisyo sa pumuluyo.
Naghandom siya sa pagdalagan sa ikatlo nga termino sang mag-ayu siya, apang gin-rekomendar gid sang iya pamilya – asawa kag isa ka anak – nga magpahuway na gid lang siya sa pulitika.
Luyag na gid lang nila nga indi na siya magbalik sa pulitika kag magdumala na lang sang pila nila ka negosyo. Kag dira na nagsugod ang pagpati sang iban nga indi na gid lang siya magabalik pa sa pulitika.
Apang, sang sini lang, nagpabutyag si Jamora sa pagbalik sa pulitika. Nalipay sini ang mga humalangad niya, kag nagpabutyag man sila sang ila luyag nga maka–serbisyo siya liwat sa mga pumuluyo.
In fact, nalakip na gani siya sa survey sang isa ka lokal nga istasyon sang radyo sa pagka-konsehal sa palabuton nga eleksyon sa 2019.
Sadto gani ginatulod pa siya agud magdalagan sa pagka-Vice Mayor. Malayo na seguro ugaling ang handom sang iya humalangad nga magdalagan pa siya sa pagka-Vice Mayor.
Madugay na siya nga wala mabatii sang mga pumuluyo sa sulod sang anom ka tuig. Kag madamo na sa ila ang gapati nga indi na gid siya mag-entra sa pulitika bisan luyag pa nila.
Bisan pa sa sini nga scenario, gapasalamat gid siya nga nadumduman siya gihapon sang madamo, labi na gid sa padayon nga survey sang radyo nga galakip sa iya sa 12 nga paga-botohon sa pagka-konsehal.
Sa sining padayon nga survey, wala nagahulog si Jamora sa ika-12 nga pwesto. Gasaka-saka gani siya sa ika-10 nga pwesto, nga ginapatihan sang iya humalangad nga magasaka pa gid sa pag-abot sang aktwal nga kampanyahanay.
Kilala si Jamora sa iya karisma sa kampanyahanay sa sulod sang duha niya ka terrmino bilang konsehal. Sadto nanguna gani siya sa mga bag-uhan nga mga kandidato sa pagka-konsehal. Nagpang-apat siya sa likod sang mga beterano kag gung-an nga mga konsehal nga sanday Tupas, Ganzon kag Zulueta.
Pila sang importante nga nabuhatan ni Jamora amo ang pagpanguna sa pag-away sa Climate Change sa siyudad. Siya ang nagpanikasug nga isulong ang “First Iloilo City Environmental Summit” sadtong Enero 6-7, 2011.
Mga 120 sang mga kilala nga mga environmentalist kag mga advocate halin sa madamo nga bahin sang pungsod ang nagtambong kag naghatag sang ila rekomendasyon.
Ining report sang Summit gin-rekomendar niya sa pagpatuman sang panguluhan sang siyudad kag natungdan nga mga ahensya sang gobyerno nasyonal.
Lakip sa sining kawsa niya batok sa Climate Change amo ang pag-away sa polusyon sang mga salakyan kag ang pagbinaha sa siyudad, ang semanal nga panglimpyo sa barangay, ang pag-regulate sang higko sa kahanginan sang mga planta, ang pag-amlig nga indi masulod sang dagat ang aton nga mga bubon kag source of potable water, ang pagpasanyog sang kabuhi sa kadagatan sa pagpalapta sang mga mangrove sa Iloilo River kag mga tributaries sini, kag iban pa.
Isa pa ka importante nga hingyu ni Jamora amo ang pagpasar sang “Anti-Discrimination in Job Hiring in Iloilo City”, nga ginpasar sang konseho kag ni meyor sadtong 2012, apat ka tuig bag-o mapasar sang 2016 ang kasubong nga kasuguan sang Kongreso sang Pilipinas.
Ang ining ordinansa nagadumili sa pag-publicar ukon pagpahibalo sang notisya nga naga-limite sang pag-apply sa trabaho sa may edad tubtub lang 25 ukon 35, kag nagabukas sang kahigayunan sa may edad-edad na nga maka-trabaho kon luyag nila.
Ang may luyag mag-trabaho galakip sa mga OFW nga nagbalik sa pungsod kag mga senior citizen ga-edad 60 anyos pataas nga “makasarang pa mag-ubra” sa ila kinamatarong sa “equal economic opportunity” sa idalom sang aton Konstitusyon. (w_mateojr@yahoo.com/PN)
