SUNU sa madamo na nga pagtugda kontra sa iya, si Presidente Duterte isa na seguro sa pinaka-“profane” (bastos, pala-insulto, mapintas sing baba, etc.) sing pamatasan sa lenggwahe kag gawi bisan sa publiko.
In other words, indi siya naga-isahanon sa sining pamatasan.
Kasubong niya sing pamatasan si anay Heneral George Patton Jr. sang US Army, nga ginakilala nga isa sang mga bantugon nga baganihan sang Ikaduha nga Gyera Kalibutan nga nanguna upod sa Allied Forces sa paglusob sa Alemanya tubtub nagyaub ini.
Kon ano ang nagtulak sa ila nga duha sa sina nga pamatasan, ang ila pagtuo isa seguro sa mga kabangdanan.
Si Presidente Duterte, bisan nagdaku sa pamilya nga katoliko kag nagtuon sa idalom sang mga pari, wala nagapati – sa iya pag-aku mismo sa publiko – nga may Impyerno kag Langit para sa mga nagtaliwan nga mga kalag.
Si Patton, samtang nagdaku sa pamilya nga Episcopalian (isa sang mga denominasyon Kristiyano), wala man gapati sa Impyerno kag Langit kay nagapati siya sa Reincarnation.
Sa sini nga pagpati, si Patton gatuo nga wala padulongan ang kalag kundi ang pagsaylo-saylo lang sa katauhan sang sapat ukon kapareho nga tawo. Ginsugid gani niya nga sadto pa nagkabuhi na siya sa pagkatawo sang lain-lain nga mga soldado.
Tungod wala ining duha gapati sa Impyerno, sa diin sunu sa pagtudlo sang Kristiyano nga pagtuluohan ang makasala sing mortal magaantos sing tuman, wala sila mahadlok sa consequencia sang ila ginahimo kag luyag himuon.
In fact, kontra ni Duterte ang Simbahan Katoliko, sa iya siling mismo, tungod sa personal nga pag-abuso sa iya sadto sang isa ka pari katoliko. Kontra man ni Patton ang katoliko. Ginpamatud-an niya ini sang ginbalabagan niya ang pagpakasal sang iya anak sa isa ka katoliko.
Wala pili si Duterte agud insultuhan ang mga tawo nga indi niya mauyunan, kag sa masami ginatawag niya ini nga “Putang ina mo!” (Your mother is a prostitute), nga naglakip kay anay US President Barack Obama kag bisan si Pope Francis, nga lider sa bug-os nga kalibutan sang Simbahan Catolica.
Si Patton kasubong man kon mamuyayaw. Ginatawag niya ang ginakaugtan niya sing “Son of a Whore!” (Anak ka sang alput). Wala man siya pili sang iya insultuhan, lakip na gani ang isa ka ultimo nga soldado. Gintawag niya ini nga “coward” (talawan) kag gintampa niya ini sang pila kabeses samtang gatalangison ang soldado sa iya nadangtan nga kapahamakan sa inaway.
Tungod sa sining insidente nga nabalhag sa tanan nga pahayagan sa Uropa, na-suspendir si Patton sang madugay bag-o makabalik sa pagpamuno sa patag-awayan nga sa idalom na sang iya anay subordinate officer.
Lubos nga nagpahuway si Patton sang ginpakamalaut niya ang Rusya nga sadto kaalyado sang Estados Unidos kag Britanya nga wala magustuhi sang dalagku nga mga pulitiko.
Sa iya bahin, si Duterte ginpakamalaut sang mga tumuluo sang Isahanon nga Diyos, nga galakip sang mga katoliko,iban nga grupo sang mga Kristiyano kag bisan sang mga Muslim, sang gintawag niya ang Diyos nga “stupid”.
Tungod sini, napilitan siya sa pagpangayo sing pasaylo. Apang sa Diyos gid lamang, siling niya, kag indi lakip ang mga tumuluo sa nagaisahanon nga Diyos. “Sorry God…”, siling niya sa isa ka interbyu sa TV.
Wala malipay sini ang Simbahan Catolica nga nagsiling nga indi sinsero ang pagpangayo sing pasaylo sa Diyos ni Duterte.
Tungod man seguro sa pagkadismaya sang mga tumuluo sang Isahanon nga Diyos, nagnubo ang trust rating ni Duterte sa mga pumuluyo pagkatapos sining pag-insulto niya sa Diyos.
Kon ginpatawad na gid man sang Diyos kag sang kadam-an nga mga pumuluyo si Duterte sa pagtawag niya sa Diyos nga “stupid”, Diyos gid lang ang nakahibalo.
Gapati kita ugaling nga may kapatawaran ang Diyos kay Duterte sa iya pagpakamalaut sa Diyos. Kag kabay man nga matagaan sang Diyos sing paghangop ang mga tumuluo Niya nga wala sing kaisug sa pagpabutyag sang ila balatyagon apang nagpakita bisan sa hipos lang sang ila pag-apin sa Iya nga aton palangga nga Diyos. (w_mateojr@yahoo.com/PN)
