MASAKO ukon nagalikaw kay nahuya?
Ini ang pamangkot nga dapat sabton ni Sangguniang Kabataan (SK) Pederasyon president Leila Luntao sa padayun niya nga kapaslawan nga magpakigkita kay Mayor Jose Espinosa III.
Sa sabat abi ni Luntao sa pamangkot sang Iloilo City Hall Press Corps, masako gid sya ano pa wala sya naka-courtesy call sa alkalde.
Anay ka…masako sya?
Teh, ngaa masami sya makita kun diin si Cong. Jerry Treñas?
Pila ka adlaw matapos sya napilian nga president, ara sya dayun sa opisina ni Treñas.
Pero 21 ka adlaw na subong sugod sang nagpangalagad sya bilang president sang SK Pederasyon ngaa wala gid sya nakapakigkita sa alkalde?
Kun makaupod sya sa mga engagements ni Treñas ngaa indi sya makadalikyat courtesy call sa alkalde?
Indi man siguro mag-akto lang sang kaangay sini si Luntao kun wala sang tawo sa likod niya. Ukon basi nahuya lang man gid sya kay na-identify sya abi sa kampo ni Treñas?
Dugangan pa abi sang iya staff nga dapat pa tudluan sang husto nga pagtrato sa katapo sang media.
Ining anak kuno sang acting city treasurer daw dapat gid guro nga matudluan sang public relations.
Panugyan lang kay Luntao, ipahigad anay ang politika sa utok mo. Bisan pa nagahambal ka nga wala ka nagapamolitika, maathag man nga bangud sang pamolitika nahuya ka na magpalapit sa alkalde sang syudad.
Sa tampad lang nga estorya, nagapamulitika ka ukon wala?
Kun naga-courtesy call ang mga dalagko nga opisyal sang gobyerno sa amay sang syudad, ngaa abi indi gid makahimo ang SK Pederasyon president?
Naga-courtesy call gani ang mga regional directors sang mga national government agencies, sya pa?
Kun may ginakatahapan ka, ipahigad ina…magpalapit ka sa amay sang syudad agud makapalambot ka sang imo gusto hatagan sang prioridad sa imo termino.
Tandaan mo nga duha ka lang ka tuig gani dapat magkuha ka sang suporta sa tanan agud mapatuman ang imo mga proyekto.
May SK man kag wala makapatuman naman sang proyekto ang syudad bangud sang Local Youth Development Office. Ara ka man ukon wala, padayun man nga mapatuman ang mga programa para sa kabataan.
Mangin lider, ka indi politiko! (jpranco1975@gmail.com/PN)
