KAANGAY sang panahon nga nagalipas, ang tanan nga talaksan nagalipas na kag dapat nga bag-uhon agud nga magsibu sa karon nga siwasyon.
Sadto ginahulat gid nga dapat malakip sa typhoon signal ang isa ka lugar antes magdeklarar ang talatapan rehiyunal sang Department of Education nga wala sang klase apang sang ulihi ginpasa naman sa tagsa ka Division Office kag District Supervisor sa paghimo sang angay nga desisyon depende sa ila nga sitwasyon.
Depende sa kabaskugon sang bagyo ang pagkanselar sang klase sa elementarya, sa hayskol kag sa kolehiyo.
Madamo man sang nagareklamo bangud sa atrasado nga paghatag sang anunsyo nga kon kaisa nakaabot na sa eskwelahan ang mga estudyante kag amo man ang paghatag sang instruksyon sa ila nga magpauli na bangud sa malain nga panahon.
Sadtong Enero 9, 2012, nagpagwa ang gobyerno sang Eecutive Order No. 66 series of 2012 nga may tig-ulo “Prescribing Rules on the Cancellation or Suspension of Classes and Work in Government Offices Due to Typhoons, Flooding, Other Weather Disturbances and Calamities.”
Gintugyan na lamang sa mga alkalde ang pag-anunsyo sang kanselasyon ukon suspensyon sang klase bangud sila ang mas nakahibalo sa sitwasyon sang ila lugar nga nasakupan kag kon angay bala nga papulion na lamang ang mga estudyante ukon lakip na ang mga empleyado sang local government unit.
Sa subong nga sitwasyon bisan wala nalakip sa typhoon signal ang isa ka lugar apang kon tuman ka munog sang ulan kag nagaresulta sang pagbaha sa pila ka mga dalanon, gina-anunsyo na ang pagkanselar sang klase.
Suno sa Executive Order No. 66 series of 2012 nga dapat alas 4:30 pa lang sang aga iga-anunsyo na kon bug-os nga adlaw nga kanselahon ukon suspendiron ang klase ukon trabaho sa gobyerno kag dapat alas 11:00 pa lang sang udto ipahibalo na kon kanselado ukon suspendido man ang klase ukon trabaho sa hapon.
Ginsiling sang DILG nga kon indi masunod ang nasambit nga mandu mahimo nga makasuhan ang local chief executive, ilabi na kon nag-anunsyon nga wala nagsibu sa nasaad nga mga oras.
Apang, may makapulong bala sa mangin lakat sang panahon? Kon luyag naton sang mas sibu nga pagbulubanta sa kahimtangan sang panahon dapat may bastante kita nga kagamitan agud mabasa ang lakat sang panahon.
Mangin kaladlawan ang LGU nga nagadeklarar sang suspensyon ukon kanselasyon sang klase ukon trabaho nga paglipas sang isa tubtub duha ka oras masanag ang butlak sang adlaw kag mainit ang panahon.
Ang pagdesisyon sang alkalde nasandig sa instrumento sa pagbasa sang panahon. Kon maghimo siya sang anunsyo dapat hiwaton ini 30 minutos matapos ang ulihi nga pagbanta sa pinakaulihi nga lakat sang panahon kag ini ang iya mangin salandigan sa pag-anunsyo.
May dapat ligwaton ukon bag-uhon ang talaksan kag mahimo lamang kon may mas abanse nga instrumento nga makatuad ang kahimtangan sang panahon.
Mas masami na ang pagtupa sang mamunog nga ulan, bisan wala pa sang bagyoukon nalakip sa typhoon signal ang LGU, nga nagatuga sang huol sa tanan.
Tion na para sa gobyerno nga bag-uhon ang talaksan agud ang salangisag malikawan. (bertladera@gmail.com/PN)
