KULANG-kulang sa duha ka bulan kag maga-file na sang ila certificates of candidacy (COC) ang mga magapapili sa local kag national elections.
Sa bulan sang Oktobre na ang filing sang COC.
Sang naggwa ang resulta sang survey sang Random Access Consultants, Inc. (RACI) nga tuman ka dako ang abanse ni Cong. Jerry Treñas kag Mayor Jose Espinosa III kun hiwaton ang election sa pagkaalkalde subong, bilang reaction gin-question ni Espinosa ang timing sang survey.
Para sa alkalde mind-conditioning lang ang survey. Ginsabat naman ni Treñas ang bilas nga naga-panic na.
Siling ni Treñas, malayo pa gani ang election ginakulbaan na si Joe III. Survey pa lang gani.
Sugod Marso sang nagdeklarar si Treñas nga gusto sya padalaganon sang mga kapitan sa pagkaalkalde, nagsugod naman sya sang iya pagtipon sang mga lider kag masako man ang iya pagtipon sang mga kapitan.
Samtang masako si Espinosa sa iya pagdumala sa syudad, si Treñas masako man sa pagpabakod sang iya mass base para sa election. May mga sugilanon pa nga ginapunggan ang mga kapitan nga magpalapit kay Espinosa kag indi man pagpasudlon sa barangay ang alkalde. Pati gani sa pista indi man kuno pag-imbitaron.
Siling ni Treñas mahuyang si Espinosa gani sya ang magapadalagan agud madepensahan ang city hall sa mga luyag magbalik sa renda sang syudad. Pero kun tan-awon ang sitwasyon, daw indi man apektado si Espinosa. Daw si Treñas man ang masako sang pagpamarangay. Pati Sangguniang Kabataan kag barangay election gin-entrahan kag dominado sang kaalyado.
Sa bahin ni Espinosa, kun estoryahon sya sang mga katapo sang media daw wala lang sya sang kulba. Kaangay nga wala nagadali sa ano man nga paghanda. Isa lang ang ginpasiguro ni Espinosa, magapadalagan sya sa pagkaalkalde sang syudad.
Siling sang insider sa grupo ni Espinosa, nagaugtas sila kay daw wala kuno nagahulag ang akalde. Wala pa sya sang ginahimo agud mapabakod ang iya grupo. Kaangay lang nga kampante sya kag wala sang ginaatubang nga away sa politika. Wala naga-panic, wala nagadali, wala naga-rattle.
Ang masakit lang nga isyu subong sa administrasyon ni Espinosa ang ginaalegar pagpahalin sang mga job hires nga kilala kadampig sang iya bilas. Pero paathag ni City Administrator Hernando Galvez normal lang nga proseso ang nagakatabu.
Kun si Espinosa may “Pag-ulikid” sa barangay, si Treñas may kape-kape naman kaupod ang iya mga councilorables sa mga barangay.
Kun si Espinosa kinaandan ang mga proyekto nga ginapatuman bilang alkalde sang syudad, si Treñas buhos na ang proyekto sa mga kaalyado nga barangay gikan sa iya pondo.
Kun si Treñas may “Uswag” scholars nga nagahatag sang tag-P2,500 kada tuig, si Espinosa may “Pag-ulikid” scholars nga may allowance nga P1,000 kada bulan ukon P10,000 sa bug-os nga school year.
Kun si Treñas may Leila Luntao nga SK Federation president, si Espinosa may Toni Gallos nga executive assistant for youth and sports.
Sin-o ang naga-panic kag sin-o ang kalmante?
Sin-o ang nagapalamunggo kag sin-o ang nagapatawhay lang?
Teh, kun makita ninyo ang magbilas, sin-o ang stressed kag sin-o ang relaxed?
Abi himutari ninyo. (jpranco1975@gmail.com/PN)
