ANG TANAN nga atleta ukon team luyag magdaug sa kompetisyon. Kon indi gid man tsampyon, okey na ang makasulod sa Top 3 sa madamo nga nagapasakop agud makadala sing medalya nga mapabugal nila.
Ukon bisan magpakita man lang sang maayo nga showing sa ila pag-representar sang ila eskwelahan, distrito, ukon sang pungsod.
In fact, ang pagpakita sang maayo nga showing sang atleta ukon team, madaug man ukon mapierde, bastante na nga makapasadya kag mag-ani sing pagdayaw sang mga supporter. Indi bala?
Tungod sini, himuon sang pamunuan ang tanan agud mapabakud ang ila mga atleta kag team, katulad sang basketbol nga ginakalingawan gid sang mga Filipino.
Sa pagpabakud sang team, kon matugutan, ang pamunuan nagakuha gani sang mga bag-o ukon dugang nga mga atleta halin sa gwa sang lokal nga team.
Sa masami, partikular sa kaso sang basketbol sa Pilipinas, ginatugutan sang FIBA World Cup kag Asian Games (Asiad) nga malakip sa lokal nga team ang mga maayo nga player nga makuha naton halin sa mga half-Filipino kag naturalized nga mga Filipino sa mga internasyonal nga mga pahampang katulad sang NBA sang Estados Unidos.
Kon kis-a indi man ugaling mahapos ang pagkuha sang mga player halin sa gwa sang lokal nga team, labi na gid kon magahalin pa sa iban nga team sang iban nga pungsod tungod sa mga regulasyon sang ila pagpasakop sa gwa sang ila team.
Sa sining ulihi lang, nagka-problema gani kita sa pagkuha sa half-Filipino nga si Jordan Clarkson sang Cavaliers agud ilakip sa aton team sa Asian Games nga hampangon na sa Agosto 18 tubtub Setyembre 2 sa sining tuig.
Sunu sa pagdumalahan sang Cavaliers, matugutan lang nila nga makuha sang Pilipinas ang 6’5” nga si Clarkson sa FIBA pero indi sa Asian Games.
Madamo ugaling ang nagkwestyon sining desisyon sang pagdumalahan sang Cavaliers. Ina tungod gintugutan man sang Houston Rockets nga mahulam ang 7’2” nga si Zhou Qi sang Tsina agud makapasakop sa Asian Games nga may blessings sang NBA.
Madamo nga mga utod naton nga netizen sa social media ang nagsiling nga may discriminasyon ang ining desisyon sa kaso ni Clarkson kag Zhou Qi.
Nga daan bag-o lang kita ginpakitaan sang indi maayo nga batasan (pagka-arogante, pagpakanubo kag pagkapintas) sang mga Boomers sang Australia sa qualifying game naton (Gilas Pilipinas) sa FIBA sadtong hampang nila diri mismo sa Pilipinas sa Bocaue, Bulacan.
Sa sining ila hampang, si Pogoy sang Gilas ginsiko sa liog ni Kickert sang Boomers nga, sunu sa isa ka karate expert, puede ini siya mapatay kon napuruhan.
Ginbangdan gani ini sang kinagamo sa basketball court nga naglakip kay Gilas coach nga si Chot Reyes kag assistant coach Uichiko.
Napulo gid ka player sang Gilas, lakip ang ining duha, ang ginpatongan sing suspension. Tatlo lang ang sa Boomers.
Gapati kita ugaling nga ang penalidad ni Kickert sang Boomers amo gid nga i-“ban for life” siya kag indi lang suspendihon sang tatlo ka games.
Tani, i-reconsider sang NBA ang desisyon sang Cavaliers nga indi ipahulam si Clarkson sa Philippine team para sa Asian Games kay gintugutan man sini ang pagpahulam kay Zhou Qi sa team sang Tsina.
Kon mahimo nila ini, puede na kita magpati nga wala man gali sing diskriminasyon ang desisyon sang NBA sa aton nga mga Filipino.
***
Tandaan naton nga ang away (lakip ang kontrobersya sa indi pagpahulam kay Clarkson sa Philippine team) indi lang madaug paagi sa pagpakita sang kusog, kundi sa mas epektibo nga away psychological.
Tinumba sang Kristiyanismo ang gamhanan nga Imperyo Romano nga naggamit lang sang krus ni Kristo.
Nabawi man sang mga Vietnamese ang ila pungsod sa gahum sang mga dumuluong tungod lang sa ila indi malingkang nga gugma kag kinamatarong sa ila pungsod bisan ang ginaatubang nila ang wala tupong nga kusog sang mga dumuluong.
Angot sa sining mga kamatuoran, madamo nga mga Filipino ang maisug nga nagpabutyag sang ila kalain sing buot sa NBA. Luyag na nila i-boycott ang pagtan-aw sang mga NBA games diri sa pungsod. Ano abe sa inyo? (w_mateojr@yahoo.com/PN)
