NAG-IGRAB sa paminsaron sang iban nga mga opisyales sang syudad ang ginduso nga plano sang Public Safety and Transportation Management Office (PSTMO) nga hatagan sang accreditation ang mga barker sa syudad sang Iloilo.
Katuyuan ni Jeck Conlu sang PSTMO nga i-accredited ang mga barker paagi sa proseso kag rekomendasyon sang sektor sang transportasyon agud nga mahapos magtumod kon sin-o ang barker sa isa ka teritoryo. Posible nga mapamangkutan sila sa kon ano ang nagakatabu sa ila nga nasakupan, ilabi kon may nakawatan, nasag-iran ukon anuman nga insidente.
Ginsiling ni Conlu nga ang mga barker ang ginahimo man sang kapulisan nga informant ukon ginakwaan sang impormasyon angot sa mga bagay nga ila ginausisa nga makabulig sa ila imbestigasyon ukon pagtipon sang kinahanglanon nga impormasyon.
Ginalantaw man ni Conlu nga makabulig ang barker sa paghatag sang gilayon nga bulig ilabi na kon nagagutok ang trapiko, paagi sa paghanas sa ila, agud nga madireheran ang dalan samtang wala pa ang natungdan na traffic aide nga magarespondi sa lugar.
Maayo ang katuyuan sang sini nga plano, kaangay sang plano sadto nga ginbuligan ang mga barker paagi sa paghatag sa ila sang bulig pinansyal agud nga magbiya sa ila pagka-barker kag magsugod sa bag-o nga palangabuhian gamit ang kantidad nga ginhatag sang city government.
Ang tanan nagtapos sa kapaslawan. Wala sang barker nga nag-ayuhan sa negosyo. Wala sang sugilanon nga mabatian nga may nagbag-o sang kabuhi bangud sa ginhatag nga palangabuhian sang syudad. Ang masakit pa kay ang iban sa ila liwat nga nagbalik sa pagka-barker matapos nga magtahaw ang isyu kag pagpatuman sang hugot sa ordinansa.
Maathag nga ginadumilian ang barker sa idalom sang Regulation Ordinance No. 2014-194. Ginasaad sa Section 5 sang ordinansa nga ang sin-o man nga naga-akto bilang barker ang pagadakpon kag gilayon nga prisuhon, kag kon siya ang mapamatud-an sang korte nga guilty, siya ang mahunong sang indi magnubo sa tatlo ka bulan kag indi maglapaw sa anum ka bulan depende sa diskresyon sang korte.
Gin-aktuhan ang ordinansa sadtong Abril 8, 2014. Nangin masupog ang pagpatuman sang bag-o pa lang ang ordinansa, may ginhatag nga bulig pinansyal sa mga barker, nagtahaw ang sitwasyon, nalipatan ang mga barker, kag sang ulihi liwat sila nga nagmuad sa dalan.
Umpisa sang ginpasar ang ordinansa wala pa matakus ang kusog sini, kon ano kadalom ang kagat sang iya ngipon sa mga nagalapas kag wala pa sini naagom ang iya katuyuan nga madumilian ang mga barker sa dalan.
Kunsabagay, antes kita makjapaminsar sang manami kag madamo nga mga ideya, dapat siguro unahon naton hatagan sang dungog ang ordinansa paagi sa pagpatuman sini sang hugot, ipabatyag anay naton nga may ngipon ini nga sarang makadulot sa balatyagon kag panimuot sang mga nagalapas.
Imbis nga ipatuman sang hugot ang ordinansa, nagpangita kita sang hampol nga solusyon kag nadula ang esensya kon ngaa ginbalay ang ordinansa.
Kon mapatuman sang hugot, nahimo ang tanan, kag nakita nga may yara sang angay nga amendaran, diri naton iduso nga dapat bairon ang dupol nga ngipon sang ordinansa./PN
