Panginbulahan! Ang Hiligaynon nga tinaga para sa “congratulations” sa pagpautwas sang kalipay ukon pagkilala…kasubong sang kadalag-an ukon maayo nga nalab-utan sang isa. Kasubong abi sang paglampuwas sa pasinawan. Pagdaog sa paindis-indis. Pagkilala sang hinimuan ukon pagbaton sang dugang nga katungdanan nga nagakilala sang iya igkasarang.
Daw sa madamo na nga beses sang nagligad nga inadlaw nga nabungat ko ini nga tinaga (ukon indi gani napalab-ot ko sa indi lamang isa kundi madamo nga tawo.)
Kon sa bagay, mas mahapos magpalab-ot sang maayong kabubot-on sa isa sang sa malain o negative nga balita.
Santing gihapon abi sa palamatin-an ko ang tudlo sang akon iloy nga kon malain ukon indi matahum sa palamatin-an sang natungdan, indi mo na lang pag-ihambal o ipalab-ot. Ugaling kon, maayo…ikaw na ang mag-una “break” sang balita.
***
Ginsaulog sini’ng karon lang sang dakbanwa sang Iloilo ang ika-81 ka tuig nga Charter day.
Nasiling sa maragtas (history) nga sadtong Agosto 20, 1937, ginlagdaan ni Presidente Manuel L. Quezon ang Proclamation No. 172 nga nagatagna sang Agosto 25, 1937 bilang inauguration sang City of Iloilo kag nag-declare sadto nga adlaw nga public holiday. Ang Charter sang Iloilo City nagsugod sa inagurasyon sang City Mayor sa pagpasumpa kay Dr. Ramon J. Campos bilang una nga City Mayor nga ginpasumpa ni sadto Secretary of Interior Elpidio Quirino. Sunod sina ang pag-inaugurate ni President Quezon sang Ciudad sang Iloilo. Ang charter nagsugod sa inauguration sang City Mayor.
Ginsuguran kag gin-institutionalize ni sadto Mayor Jed Patrick Mabilog ang Charter Day celebration sa pagdumdum kon paano nagsugod ang pagka-syudad sang Iloilo.
Kasubong sang pagsaulog, ang una nga Charter Day celebration ginlakipan sang grand civic military parade nga nagtangko sa daan nga site sang City Hall (nga amo karon ang city campus sang University of the Philippines in the Visayas).
***
Walo ka dekada ang nakalipas, malayo na ang nalab-utan sang syudad sang Iloilo. Ginakilala ini nga isa sa mga nagapanguna nga competent cities sang pungsod.
Ang Charter Day celebration karon nga tuig nangin makahulugan kag nahatagan sang dako nga kabilinggan sa pagkilala sang Cities and Municipalities Competitiveness Index (CMCI) sang Syudad sang Iloilo bilang most improved city kag naghimo sini nga ika-11 ka competent city sa tanan nga mga dakbanwa sa pungsod.
Karon nga tuig nga selebrasyon ginapamunuan ni Mayor Jose S. Espinosa III, ang una nga selebrasyon matapos nga nabutang sya sa katungdanan kag amo ang tagpamuno karon sa syudad.
Panginbulahan, sa isa naman ka tuig nga paghimakas para sa katin-aran sang syudad! Bulahan ang mga Ilonggong syudadano.
***
Maathag man sa mga pamatan-on karon ang kahalangdon kag katahum sang dakbanwa sang Iloilo. Halin sa mga halangdon nga mga syudadano nga ginbatiti sini, tubtub sa mga makasaysayan kag mga matahum nga mga lugar – mga simbahan, mga mansion kag iban pa – ila ginkilala ang kinaiya sang Ciudad sang Iloilo sa isa ka Paindis-indis sa Binalaybay nga ginpatigayon sang Talatapan sang Turismo sa Syudad nga ginapamunuan ni Ginang Junel Ann P. Divinagracia.
Matahum ang mga piesa sang binalaybay nga ginsulat sa Hiligaynon sang mga sampaton nga mga manunulat para sa ila mga pumalasakop (contestants). Ang mga pasakop nga nagdaog amo ang mga ginsulat ni Dr. Jose B. Barselona para sa Hua Siong College of Iloilo (nahauna nga lugar).
Ang sinulatan ni Frank C. Bebit para sa Iloilo National High School (nagpangaduha ) kag ang ginsulat ni John Ramel S. Plomenis para sa La Paz National High School (nga nagpangatlo).
Matigda nga gin-interpret ang mga binalaybay sang anum ka pumalasakop. Nagdaog sa binalaybay si John Reve Gilbert Peremne sang Iloilo National High School. Ginsundan ni Mark Raegan Teorima sang La Paz National High School kag nagpangatlo si Roselle Ann Jambaro sang Iloilo Science and Technology University.
Panginbulahan sa mga nagdaog. Kasubong man nga pagpanginbulahan ang aton ginapalab-ot sa mga iban pa nga nagpasakop bisan pa nga wala nakalusot sa mayor nga lugar. Kudos sa organizers sang paindis-indis kay paagi sini padaypon naton matib-ong ang Kulturang Ilong-ilonganon.
***
Sang Agosto 22 tubtub 24, ginhiwat sang Philippine Information Agency ang 2018 Campus Journalism Seminar Workshop. Ang ika-43 nga edition sa tema nga “Responsible Journalism” ginpsakupan sang indi magkubos 470 ka campus journalists gikan sa mga nagkalain-lain nga eskuelahan – sa mga state colleges and universities subong man sa mga private school sa bilog nga Kabisay-an Nakatungdan.
Ang seminar workshop tuigan nga ginahimo sang PIA Regional Office 6 para mahanas ang mga pamatan-on sa pagsulat. Karon nga tuig, ang training gindumala ni Leonard Pineda. Kudos sa iya lideratura kag sa iya team sa kadalag-an sang paghanas sang mga campus journalists sa college level (sa bulig sang mga sampaton nga resource persons.)
Ginapanginbulahan sini’ng kubos ninyo nga kolumnista si Runrick Jamolo Tallafer nga ginkilala nga Promising (English) Editorial Writer. Si Tallafer ang Editor-in-Chief sang “The Aquarian” , ang campus paper sang Carlos Hilado Memorial State College sang Binalbagan Campus sa Binalbagan, negros Occidental.
Bulahan ka, Runrick!/PN
