GINAKASUBO gid naton ang pagtaliwan ni Danny Fajardo, 72, founder kag editor/publisher sang Panay News, ang nagapanguna nga rehiyonal nga daily sa English diri sa Kabisay-an Nakatundan.
Siya man ang tagtukod sang naga-isahanon nga daily nga pamantalaan sa Hiligaynon (Ilonggo dialect) – ang Panay Balita, nga ginabalhag man sa Kabisay-an Nakatundan.
Gin-admitir si Danny sa ospital, sunu sa iya anak nga si Idol, sadtong Miyerkoles, Setyembre 5, tungod sa barado nga ugat sa iya tagipusuon. Nangin-madinalag-on ang operasyon, sunu man kay Idol, apang nag-kumplikasyon ini nga amo ang iya ginkamatay.
Didto na siya ginkuhaan sing ginhawa sa Asian Hospital sa diin ginhingagaw siya.
Sunu kay Idol, basi dalhon sa Iloilo ang bangkay ni Danny kahapon (Setyembre 11) ukon buas (karon, Setyembre 12). Wala pa sing schedule ang lubong.
***
Isa si Danny sa maisug (fearless) nga mga peryodista diri sa rehiyon, nga bisan ang mga kaaway niya sa iya sinulatan may pagtahod, kay samtang wala siya ginakilala nga ginakahadlukan sa iya panulat, “fair” ini siya sa iya mga panugdaon.
Indi man madumtanon si Danny. Kon maghalin ka sa iya pamantalan “to seek greener pasture” ukon maghalin tungod may indi ka nagustuhan sa iya pagdumala, wala ini siya nagatanom sing dumot kag madale makalimot sang kon ano man nga paglainay sing buot.
In fact, kon maghalin ka, puede ka gihapon makabalik sa pagsulat sa iya pamantalaan, “no questions asked” basta may lugar lang. Kon kis-a siya pa gani ang ga-imbitar sa imo agud magbalik.
Ako gani katatlo naghalin sa Panay News kag katatlo man nagbalik sa pagsulat sa Panay News nga wala man sing lainay sing buot. Mag-amigo man kami gihapon. Trabaho lang nga wala sing personalay.
Paalam, abyan kag boss Danny…Sa imo ang dayon nga kapahuwayan upod sa aton mapinalanggaon nga Makaako sa Kalangitan.
***
Ginahingyu sa karon sang Public Safety and Transportation Management Office (PSTMO) ang Iloilo City Sanggunian agud nga i-legalize ang trabaho sang mga barkers, ukon transport dispatchers, diri sa siyudad.
Ini sila makita naton sa kon diin lang nga bahin sang mga dalanon nga nagapatigayon sang pagsakay sang mga pasahero sa kon diin may nagahulat nga salakyan – dyep, tricycle, bus, express van, kag bisan sa taksi, sa authorized man ukon indi nga lugar sa siyudad.
Nangin daku ugaling nga problema ang mga barkers tungod man sa madamo nga problema nga ginadulot nila sini sadto kag tubtub subong.
Isa na dira ang reklamo sang mga drayber sang mga dyepney (kag sang iban pa nga salakyan) parti sa ila pagpatigayon sang pasahero nga ginapangayuan nila sing bayad bisan wala man lang ginalihog sang mga drayber.
Labi na gid kon yara na ang mga dyepney sa mga authorized loading/unloading nga lugar, sa diin nagalinya na agud magapasakay na gid lang sang pasahero nga indi na kinahanglan sang kon sin-o nga magpatigayon.
Ginasiling man nga nagapangayo ining mga barker sang bayad sa ila serbisyo (sa masami tag-lima ka pesos kada trip), nga kon indi ka maghatag tandaan ka nila kag himuan sing indi maayo.
Sang panahon ni Konsehal Erwin Plagata, nga tsirman sang komite sa trapik, ginreklamo pa gani sini nga ang iban sa sining mga barker nagapang-snatch sang mga bag sang mga pasahero kag naga-courier pa sang droga.
Tungod sini, nagpasar ang konseho sang Anti-Barker Ordinance, nga ang madakpan may pagka-priso sang minimum nga tatlo ka bulan tubtub sa maximum nga anom ka bulan.
Apang yara gihapon sila! Sa karon, ang ideya sang PSTMO amo nga i-authorize na gid lang sila bilang dispatcher sang mga transport organization nga makabulig man sa pag-areglo sa parkingan.
Luyag ugaling ni Mayor Jose Espinosa III nga tun-an anay ini nga proposal sang PSTMO sing maayo.
“Basi bala sa lugar nga makabulig sa problema, basi makapagamo pa ini,” siling gani ni mayor. (w_mateojr@yahoo.com/PN)
