SI MAYOR Jose Espinosa III sa Nacionalista Party (NP), kaalyado sang administrasyon.
Si Cong. Jerry Treñas sa PDP-Laban, ang partido ni President Rodrigo Duterte sang nagpadalagan ini sa pagkapresidente sang 2016 election.
Ginasiling nga ang NP nga partido ni Espinosa amo ang pinakadako nga campaign contributor sang Duterte Campaign. Ini ang kabangdanan nga ginhatag kay Secretary Mark Villar, anak ni Party President Sen. Cynthia Villar, ang Department of Public Works and Highways (DPWH) portfolio.
Ang maninoy naman ni Treñas amo si anay House Speaker Pantaleon Alvarez nga gin-agawan sang pwesto ni anay Presidente kag karon Pampanga congresswoman Gloria Macapagal-Arroyo.
Sanday Espinosa kag Treñas lunsay kaalyado sang Ppresident. Pareho man sila nga magapadalagan sa pagkaalkalde sang syudad. Pareho sila nga nagahulat kun sin-o ang bendisyunan ni Duterte.
Sa nakaligad nga mga binulan, madamo sang mga hitabu nga nagapalingin sa ulo sang mga Ilonggo kun sin-o gid bala ang sakdagon ni Duterte sa pagkaalkalde sa syudad. Si Espinosa makapila na ka beses nga nakasugilanon ang Presidente. Benefactor pa niya ang pinakabaskog nga kaalyado sang Presidente nga si Senator Villar.
Si Treñas wala pa sang napakita nga nakasugilanon sya sang personal sa President. Ang iya maninoy nga si Alvarez ginsipa naman sa Kamara bilang House Speaker kag nangin minority na lang karon.
Paglaum tani ni Treñas ang iya propesor nga si Arroyo pero bati ko nagsunggod man ang anay President kay sang napriso ini halos man gani makabisita si Treñas sa iya.
Kun basehan naton ang ini nga mga sitwasyon, daw dako ang posibilidad nga si Espinosa ang mangin kandidato sang administrasyon. Idugang mo pa dira ang NP nga kaalyado na ang Hugpong Pagbabago ni Davao City mayor kag presidential daughter Sara Duterte-Carpio.
Samtang ang PDP-Laban nagabinahinbahin na subong. Matuod ayhan nga magatukod si Duterte sang iya kaugalingon nga partido kag talikdan ang PDP-Laban?
Maathag nga ang tanan nagapabor kay Espinosa. Sya lang ang politiko sa syudad nga wala nagkambyo sang partido samtang si Treñas halin sa Nacionalista Party naglumpat sa Liberal Party sadtong 2010 elections. Pero antes sini indi bala nga Lakas-CMD man si Treñas sadtong alkalde pa ini sang syudad gani ginhatag sa iya ang presidency sang League of Cities sang Arroyo administration?
Ini ayhan ang rason nga tama ka kampante si Espinosa samtang panic mode naman si Treñas?
Easy-easy lang si Espinosa bisan wala pa sang mapakita nga grupo samtang si Treñas nagareklamo na ang mga konsehal nga ginapang-akigan nya kun indi makatambong sa ila kape-kape?
Matuod man ayhan ang balita nga may mga kapitan na nga amat-amat nga nagasaylo sang suporta kay Espinosa pero wala lang nagapahayag kag natahap nga akigan kuno?
Kasadya sang politika sa syudad. Lunsay lang administrasyon. Pero sin-o ayhan ang makakuha sang bendisyon? (jpranco1975@gmail.com/PN)
