KAANGAY sang iban, ang ila pamangkot kay Mayor Jose Espinosa III, “Ano gid bala, Joe?”
Ini bangud sang padayun nga paglikaw ni Mayor Espinosa nga hambalan ang iya plano sa politika sa syudad. Samtang nagahilapit ang filing sang certificate of candidacy, isa pa lang ka major political announcement ang nahimo sang alkalde…ini amo ang magapadalagan sya sa pagka-mayor sang syudad.
Samtang human na ang lineup ni Cong. Jerry Treñas, wala pa sang matudlo nga grupo si Espinosa.
Nagahimakas man kuntani nga makig-alyansa ang grupo ni councilors Joshua Alim kag Plaridel Nava apang wala man sang commitment ang alkalde. Ang maathag lang nga nagsaylo na sa iya sanday councilors Eduardo Peñaredondo kag Daylee Zulueta-Salazar kag ara sa ila grupo si Councilor Lyndon Acap kag anay councilor Rodel Agado.
Masako lang subong ang alkalde sa iya Pag-ulikid program sa barangay. Ginadala niya ang serbisyo sang syudad sa kabarangayan kag ginaupod man ang mga posible kalakip sa iya lineup.
Masako man ang pag-deliver sang mga serbisyo sa mga kabarangayan ilabi na sa mga senior citizens. Maathag nga politika na ang hulag sang alkalde, pero ngaa wala pa niya ginabungat ang iya plano sa politika?
Husto na lang maghaumhaum ang tanan kun sin-o ang grupo kag ano ang plano ni Espinosa. Indi mapakot ang masunod niya nga tikang bangud tuman siya ka masekreto.
Ngaa bala tuman lang ang pagkakampante sang alkalde? Wala gid sang makita nga pag-panic sa iya mga hulag. Wala stress, tuman ka kampante.
Ini ayhan bangud nga ginpatawag na ang pila ka empliyado sang syudad sang Sanbdiganbayan kag Ombudsman agud estoryahan ang isyu sang Pavia Housing Project kag ang donasyon sa construction sang Iloilo Press Club Building?
Daw may nahibaluan si Joe nga wala ta maantisipar nga matabu. Ano ayhan ini?
Siling sang mga tsimoso may opisyal kuno nga ma-suspend or ma-dismiss bangud sang isyu sang corruption. Ini ayhan ang ginahulat ni Mayor Joe?
Pero kun amo ini ang iya ginahulat, base mawad-an sya sa katapusan nga hugada?
Mayor Joe, ano gid bala? (jpranco1975@gmail.com/PN)
