KAANGAY sang pagbutlak sa adlaw sa nasidlangan, ang paglaum ginalauman nga maagom sang tanan. Ginahangla, ginahanduraw agud nga makita sa pagtangla sa ibabaw.
Naghatag sang paglaum sa mga naga-adbokasiya nga dapat indi na pagtugutan nga mahatagan liwat sang prangkisa ang Panay Electric Company ukon PECO ang pagpatimaan sang interes sang isa ka kompaniya nga luyag mangin alternatibo sa ginahatag nga serbisyo sang PECO.
Malawig nga pagbatalya, madamo sang papel ang nagtipon, madamo sang talatapan ang ginpadulungan kag madamo sang mga opisyales sa nasyunal nga panggobyerno ang gintukbil agud nga balikdon ang yamo kag reklamo sang mga konsumidor.
Gintalakay sa kongreso ang hingyo sang PECO nga hatagan sila liwat sang 25 ka tuig nga prangkisa agud mapadayon ang ila pagserbisyo sa syudad sang Iloilo.
Nagtuhaw ang More Minerals Corp. ukon MMC nga naga-aplay agud nga magbulos sa power distribution sa syudad sang Iloilo paagi sa House Bill No. 8132.
Ginabalabagan ini sang Private Electric Power Operators Association ukon PEPOA sa pagsiling nga mabutang sa peligro ang syudad kag maga-antus sa power crisis.
Ginsiling sang grupo nga ang prangkisa sa power distribution ang indi dapat nga ihatag sa kompaniya nga wala sang kaugalingon nga distribution system kag magasugod pa sa wala ukon nada.
Ginasakdag sang grupo sang PEPOA ang pagtan-ay sang prangkisa sa PECO sa idalom sang House Bill No. 6023, kag sila ang nagpadala sang sulat sadtong Setyembre 19 sa tserman sang komite nga si Congressman Franz Alvarez.
Manami lang magpamati ukon magbasa sa mga punto sang nagaduso kag nagapamalabag sa paghatag liwat sang prangkisa sa PECO bangud nga aton mahimulsuhan ang mga angay nga punto.
Madmao matuod sang mga punto nga ginaplastar apang dapat lantawon naton kon nagasibu sa punto nga ginaduso sang mga konsumidor. May mga punto ang nagaduso nga hatagan liwat sang prangkisa ang PECO apang sa ila paglantaw kag pagbatyag lamang kag tuhay naman ang yara sa paminsaron kag balatyagon sang mga konsumidor.
Kon matuod nga wala sang anuman nga inagihan ukon eksperyensya ang MMC sa pagpalakat sang kompaniya sa power distribution kag kon mabutang sa peligro ang sitwasyon sang syudad bangud sa nagapanglubaybay pa nga kompaniya, paano kita makahugakom sang isa ka bagay kon puno ang aton palad sang naandan naton nga kompaniya?
Kon madugay na ang PECO sa ila negosyo, naglab-ot na sa 95 ka tuig, ngaa wala kita sang may nakita nga pag-imprubar? Kon eksperto sila sa sini nga sahi sang negosyo, ngaa madamo sang problema sa billing kag iban pa?
Kon gamay man lang ang nagareklamo sa madamo nga konsumidor, maathag nga may yara sang nagareklamo kag indi ini mabali sang punto santu sa kon pila ka porsyento lamang.
Matigayon man kag sa indi nga makasulod ang MMC ukon mabusla man ukon indi ang PECO, mangin pamukaw na ini sa PECO nga paayuhon ang serbisyo kag balikdon ang konsumidor nga nagabuhi sa ila kompaniya. Makapamuklat na ini sa ila mata nga ang dapat mahimo maislan, matunaw ukon mapanas.
Ang tanan nga iwag, sa una nagabanaag apang sa paglipas sang panahon, nagakul-aw ang kasanag. (bertladera@gmail.com/PN)
