MADAMO sang elemento ang kadalag-an sa pulitika. Matuod nga wala lang ini nasandig sa kwarta kundi nasandig man sa marot nga taktika, sa kon paano magbasa sa hulag sang kasumpong kag kon paano tukibon ang kahuyang sang kasumpong kag dapat gilayon nga bakulon agud nga ini ang manimuron.
Madamo sang ginapalagaw nga impormasyon kag pililion lamang diri ang may yara sang kumpirmasyon ukon mga bagay nga ginaaku kag ginapapag-on paagi sa pagbungat nga may salandigan ukon pamatuod.
Kadamuan sang sini nga mga impormasyon ang ginapalagaw agud nga makapanghimulso sa kon ano ang balatyagon kag panan-awan sang mga tawo, nagapamunit ini sang opinyon kag nagatilaw sa sabor sang panamil sang mga botante.
May mga emisaryo nga ginapadala, nagahulag, nagapakigbahin, kag nagapabatyag sa mga pumuluyo sa akon ano ang ila mga tinutuyo. Apang kon pamangkuton, ang ila sabat nga kabahin ini sang ila tulumanon para sa mga pumuluyo, luyag nila nga ipakita kag ipabatyag nga yara sila nga suluguon sang banwa nga nagapalapit para sa ila mga nasakupan.
May yara naman sang mga pulitiko nga mahilig maggamit sang trompa. Malayo pa sila apang bation na ang ila tikang, nagalanog na ang ila tingog kag luyag nga magpangganyat nga siya ang abi-abihon samtang sila ang nagapadulong sa isa ka doog.
Aton lantawon ang sitwasyon sa probinsya sang Iloilo, masaku ang lagaw ni Congressman Ferj Biron kag kahibalo ang tanan sa iya tinutuyo nga magpapili bilang gobernador. Madamo man sang mga estudyante ang nakabaton sang iya kaalwan paagi sa paghatag niya sa ila sang bag para sa ila pagbutho.
Ginakwestyon naman kon ngaa indi makita si Cong. Toto Defensor sa paglibot sa probinsya sang Iloilo apisar nga siya ang ginasiling nga magakandidato sa pagka-gobernador.
Masami nga makita ang presensya ni Board Member Nonoy Defensor nga yara sa mga okasyon kag masami nga nagapamulong-pulong. Ginapaanggid man siya nga halos kaangay sa iya amay nga si Gov. Arthur Defensor Sr.
Maathag nga kandidato sang Nacionalista Party sa pagka-gobernador si Congressman Biron. Temprano pa siya nag-anunsyo kag temprano pa naghulag kag tubtub subong sige ang iya nga hulag bilang pagpangghanda sa pagpangampanya.
Kandidato naman sang PDP-Laban si Cong. Toto Defensor kag ini mismo ang ginabantala sang iya amay nga gobernador.
Apang sa mata kag pulso sang mga pumuluyo, mas angayan si Board Member Nonoy Defensor sa pagka-gobernador, anggid siya sa iya paghambal kag kinaiya sa iya amay nga gobernador.
Sa sulod sang isa ka semana umpisa karon, magabuka ang ila alukaba, mahumlad ang ila matuod nga nawong kag duag sang ila panit.
Sa kinaandan, may kandidato nga mahilig sa pagpasundayag kag pagpasalida, may yara naman sang nagalikom sa iya nga paghaboy sang inumol agud nga indi mamulalungan sang kasumpong kon san-o kag sa diin magatupa ang iya paghanot.
Nagahawat-hawat ang tanan sa pag-umpisa sang pag-file sang certificate of candidacy apisar nga may iban sa ila nga sa ulihi pa nga adlaw magapatigayon sini.
Posible nga kita ang ginalita kag ginalingaw sang kandidato bangud may higayon pa nga magligwat, mag-atras, ukon magpasalili sa iban./PN
