Bilang isa ka ordinaryo nga konsumidor sang kuryente, ano gid bala ka dalum ang imo nahibaluan sa ginareklamo sang mga nagapamatok sa renewal sang franchise sang Panay Electric Company (PECO)?
Ang atun desisyon nagadepende kun ano ang aton experience sa serbisyo sang PECO. Kun malain gani sigurado nga kontra natun ang PECO samtang kun maayo naman posible nga mabuyok pa kita sang mga nagakontra sa kumpaniya agud pamatukan ang ila franchise extension application sa Kongreso.
Pero sigurado bala kita nga kun wala na ang PECO maayo ang atun mangin kahimtangan sa kamot sang More Electric and Power Corporation (MEPC ukon More Power)? Makasigurado ayhan kita nga mas maayo ang ila serbisyo sang sa PECO? Ano ang atun kasiguraduhan?
May mga lehitimo nga palamangkutanon nga dapat sabton sang More Power.
Una, kun indi pag-ibaligya ni PECO ang ila assets sa More Power makapatindog ayhan sila sang ila pasildiad sa sulod sang isa ka tuig? Natan-aw kag nakita bala nila ang mga requisites antes mapatindog ang pasilidad? Mahapos ang magpangako, apang mabudlay ang pagtuman sini. Daw puno na ang atun syudad sang mga alambre, the diin ya maagi ang linya sang More Power?
Ikaduha, diin sila makuha sang ila power supply? Antes ka maka-distribute sang kuryente, indi bala nga dapat may ara ka na sang supply contract? May mga tuyo na bala sila kun diin mabakal sang kuryente? Tandaan nga ang pagsiguro sang power supply contract malawig ang proseso bangud aprobahan pa ini sang ERC kag magaagi pa sa public hearing. Makakuha ayhan sila sang power supply on time? Makanegosyar na bala sila?
Ikatatlo, may kontrata na bala sila sa National Grid Corporation of the Philippines ukon NGCP? Dapat may transmission service agreement na sila sa NGCP. Base sa atun pagpanalawsaw indi ka makatakod sa linya sang NGCP kun wala ka sang grave impact study nga nagalawig sang binulan ukon tinuig antes matapos. Dapat may aprobado sila nga transmission agreement kag lugar kun diin ibutang ang ila substations. Ang pag-order sang substation indi man magnubo sa isa ka tuig ang proseso sini.
Sa simple nga panan-awan, realistic bala nga matapos ini sa sulod sang isa ka tuig?
Base sa record wala sang experience ang More Power sa power distribution. Tinuig naman gani nga wala sila sang mining contract. Buot silingon natulugan ang kumpaniya kag nagbugtaw agud magsulod sa power distribution.
Kabay pa nga indi matabu ang natabu sa NGCP nga matpos ginbakal, ila man lang ginbaligya sa kumpaniya nga ginapanag-iyahan sang mga Sy.
Kabay pa nga indi kita maggamit sang sulo kag kingki sa masunod nga inadlaw. (jpranco1975@gmail.com/PN)
