SA MALAWIG nga sinimana nga wala nakuha ang jackpot sa 6/58 Ultra Lotto, tuman ang paggutok sang mga lotto betting stations. Maathag nga madamo ang nagapasimpalad nga makuha ang masobra isa ka billion nga jackpot. Ang masubo para sa wala nagdaug kay sadtong Dominggo may duha na ka nagdaug sang masobra isa ka billion nga jackpot.
Sa pungsod nga tuman ka taas ang estado sang kaimulon madamo ang nagapasimpalad para sa madasig nga manggad. Isa ka halimbawa diri ang mga nagakalabiktima sang budol-budol nga bisan makapila na ginpaandaman, nagakadala sa gihapon.
Ara man ang mga nagakabiktima sang pyramiding scheme nga nagtaya sang iya minilyon nga pinangabudlayan. Bisan pa madamo na ang nabalita nga nabiktima sini wala gid sang kadudlaan ang tawo.
Nag-uso naman ang love scam. Ini ang modus nga may nagadiskarte sa online gamit ang social media ukon email kag kun makuha na ang pagsalig sang ila target, huthutan nila sang kwarta sa promise nga may ipadala nga package. Ini nga modus madugay na nga nagalapta.
Madamo na ang nabiktima..madamo na ang gindakop sang mga otoridad. Apang ngaa padayun sila nga naga-operate? Ina bangud may mga Pinoy nga mahilig sa mahapos nga kwarta kag wala sang kaayawan sa manggad. Bisan pa bastante na ang ginauyatan nga kwarta nagapaminsar pa guid kun paano pamuaron ang ila kwarta sa madasig nga pamaagi.
Ang makahalam-ot diri amo ang may mabaton ka nga text nga nagdaug ka sa raffle sang isa ka foundation. Kun matarong ang imo paminsaron mamangkot ka gid nga paano ka magdaug kay wala ka man sang gintay-an?
Sa pihak sang paandam sang mga otoridad, madamo sa gihapon ang nabiktima sa atun. Ano abi hay kun tanyagan sang dako nga tubo sang kwarta, nagasiga dayun ang mata. Wala nagapaminsar nga wala ka nangabudlay pero amo gid na kadako ang interes sang imo investment.
Ang matuod nga kabangdanan sini amo nga mahilig kita sa swerte kag wala sang kaayawan sa kwarta. Kun mahimo pa lang gusto naton magganar sang dako bisan wala sang pinangabudlayan.
Samtang amo sini ang atun paminsaron, madamo sa atun ang padayun nga matuntuhan. Indi malayo nga isa sa mga kilala mo ukon himata mo ang madulaan bangud sa handum sang madawig nga pagmanggaran. (jpranco1975@gmail.com/PN)
