MADUMDUMAN pa seguro ninyo nga nakamuno kita diri sa aton kolum parti sa wala ko pagkakita sang bisan isa man lang ka pulis nga nagasimba sa Mandurriao Church, sa diin kami ni asawahon nagasimba kon Domingo.
Bag-o pa lang nga nagsugod ang misa sadtong Domingo sang makabalikid ako sa likuran namon ni asawahon. Daw indi ako magpati, apang yara gid sa amon likuran ang tatlo ka lamharon nga mga pulis – isa ang babaye kag duha ang lalake.
Seryoso ang ila panulok sa akon, kag nagbalik sa akon painu-ino ang pila ka posibilidad.
Una, nga basi may warrant of arrest naman ako sa kaso nga libel angot sa akon ginasulat sa aton kolum diri sa Panay News.
Matandaan ko pa ang pagdakop sa akon sang mga pulis tungod sa isa ka kaso nga libel. Isa ini sang mga 30 ka libel cases sa diin na-akusaran ako. Ugaling naubos man ini tanan na-dismiss sa sulod sang mga lima ka tuig nga kasohay.
Ang ining ulihi ko nga libel case amo ang gin-file sa akon kag isa ka reporter ko bilang editor sadto sa isa ka pamantalaan (indi ang Panay News).
Ang gintunaan sini amo ang report parti sa isa tsirman sang Sangguniang Kabataan sa Pavia nga gin-ulamid sang isa ka testigo sa bisyo sang droga.
Bag-o sining ulihi nga kaso, pwede pa mag-file sang “bail” nga indi kinahanglan ka dakpon kag dalhon sa atubang sang hwes agud i-“arraign”. Sa sining hugada, lain na ang patakaran.
Ginpaatubang gid ako sa hwes kag nag-deklarar sang akon pagka-inosente sa akusasyon sa “arraignment”. Tapos sina gindala na ako sa Mandurriao Police Station tungod seguro kay nagapuyo ako sa Mandurriao.
Salamat kay may brod ako nga pulis sa fraternity (Sigma Rho) nga nag-ayu nga indi ako mapasulod sa selda kundi dira lang sa ginahulatan sang mga bisita, samtang gahulat nga dalhon sa BJMP Jaro agud ma-subject sa mga requisitos katulad sang health examination.
Sang hapon mismo gintugtan na ako mag-file sang akon “bail” nga P10,000. Sadto, ang “bail” P5,000 pa lang agud indi mahunong sa prisuhan samtang gina-hearing ang kaso. Mga sobra isa ka tuig gid man ang kasohay bag-o ini na-dismiss.
Wala ko gintagaan sing importansya ang ikaduha ko nga panagupnop nga dakpon ako sang mga pulis, katulad sang pag-”hostage” sang lima ka pulis sa akon agud mapakalma ang amon protest rally, nga gin-updan sang mga 15,000 ka rallyista, batok sa Camp Delgado.
Ina tungod wala man sing martial law sa karon diri sa kabug-usan sang Pilipinas – sa Mindanao lang, nga gin-deklarar ni Presidente Duterte.
Panahon yadto sang ulihi nga tuig (1986) sang Marcos martial law atong amon protest rally. Batok ato sa pag-“massacre” sang sobra 10 ka mangunguma sa Negros samtang naga-protesta ang sobra isa ka gatos sa ila sa atubang sang municipal hall. Ginpa-arakan sila sang machine gun halin sa balkonahe sang munisiplyo sang indi sila maghalin kag naghuray-ad gid ang iban.
Nakapalagyo ako sa mga nag-“hostage” sa akon sa Iloilo Customs House sang naglisensya ako nga mangihi. Sang nakapalagyo na ako kag nakita sang kaupdanan ako nga hilway na ako sa peligro, dayon man nagpadayon ang amon pag-martsa pa Camp Delgado.
Binalabagan kami sang mga pulis sa idalom ni sadto Chief of Police Achilles Plagata sa Plaza Libertad pa lang. Armado sang mga batuta nga uway sila samtang sa unhan may “long-arms” ang iban.
Nagsulong kami nga nagasyagit kontra kay Marcos. Sa unahan namon ang amon “balbal unit” nga handa magpabal-balbal sa mga pulis agud indi masaktan ang amon mga lideres.
Apang nadaog kami sang mga pulis nga wala kag tuo nga namalbal sa mga rallyista nga naglinapta tubtub nag-desidir kami nga mag-atras “to fight another day”.
Pila lang ka bulan ang nagligad kag nalagyo na si Diktador Marcos kag ang iya pamilya padulong sa Hawaii nga wala na ginlagas sang gobyerno ni Cory.
Tani ang tanan nga pulis nagakilala sa Diyos nga ang gahum kag kawsa mas mataas pa sa kon sin-o nga diktador agud dampigan ang aton demokrasya, katulad sadtong pagpangisug nanday Heneral Fidel Ramos kag Defense Secretary Juan Ponce Enrile agud tumbahon ang diktadura nga pagginahum ni Marcos. (w_mateojr@yahoo.com/PN)
